Anak mit ‘setengah nyawa’ labuh ari tingkat 29

BEIJING: Siku anak mit beumur tiga taun selamat pengudah labuh ari tingkat 29 sebuah rumah flat maya ditinggal kediri ba mengeri Changzhou, China apin lama, ku Mail Online kena 18 Jun tu tadi.

Nembiak ti semina dikanggau nama timang Yang Yang nya niki penjan dapur rumah ngena bangku sebedau labuh ba peninggi nyau ka 91.44 meter ba atas pun bungai, ku apai iya ngagai siku pemberita.

Iya diripotka balat bakal maya ditabanka ngagai sepital, tang diripotka majak gerai pengudah semilan hari diperubat.

Pekara nya nyadi kenaka tengah hari kena 8 June nyin kemari di mengeri nya, ku China News.

Apai indai nembiak nya pekerja datai ari wilayah Henan.

Yang Yang diibun ini iya maya apai indai iya gawa.

Ku apai iya ti benama Zhou, Yang Yang ditinggal kediri seraya meda televisyen lebuh ini iya ke bilik ngambi barang.

Tang, lebuh ini nembiak lelaki nya pansut urung 10 minit udah nya, iya enda tetemuka nembiak nya.

Tambah mega, iya meda penjan dapur rumah sida ti ditutup udah tebuka.

“Ari nya iya nemu uchu iya udah labuh ba atas pun bungai di baruh begunan.

“Udah tepedaka uchu iya labuh, iya manjung sebedau luput lalat,” ku Zhou ngagai tim Televisyen enggau Radio Jiangsu.

Iya ngasaika pun bungai ba luar rumah nya jai ketegal ditinggang tubuh Yang Yang, tang pun bungai nya udah nyelamatka nembiak nya ari bakal ti lebih balat.

Dr Zhou Guojin iya nya Direktor Opis Palan Berubat Intensif di sepital nya madahka, anak mit lelaki nya benung kritikal maya ditabanka ngagai sepital.

Ku iya, Yang Yang agi tegepang enggau tusah deka enseput.

Iya mega bisi bakal, telih ba lempuang, kembai ba kekedua buah punggung, patah tulang rusuk enggau bedarah ba belakang punggung.

Piak sepital numbuhka sebuah tim ngundan 10 iku pakar ari mayuh bengkah opis enggau makmal dikena ngubat Yang Yang dalam unit sakit raya sepengelama lebih seminggu. Ejensi

Suara Sarawak