Anak Sarawak deka nadai utang PTPTN

KUALA LUMPUR: Perintah Sarawak deka mantu ngelempungka tating belanja peranak Sarawak ti napi pemar mayar pinjau Opis Wang Turu Pelajar Tinggi Nasional (PTPTN).

Kepala Menteri, Datuk Patinggi Abang Johari Tun Openg madah, perintah diatu benung beratika chara dikena bejalaika bantu dikena ngelempungka tating belanja sida ke nerima pinjau.

“Kitai deka berati baka ni bantu tu dipejalai, sekalika kitai meri mata duit lalu kita mayar pinjau nya. Beri timpuh ngagai Perintah Gempung Parti Sarawak (GPS) mutarka pekara tu,” terang iya.

Ku iya, Perintah Pakatan Harapan (PH) kala besemaya enti sema mujur numbuhka perintah (pengudah PRU) PTPTN deka dikinsil, tang diatu nyau lain utai ke nyadi.

“Anak Sarawak enda ngutang PTPTN. Kitai deka bisi agih belanja ungkup pekara tu. Besampi mih Perintah Sarawak ulih mutar,” ku iya.

Kepala Menteri mai berita manah nya rambau Sesi Town Hall nyerumba Lan Berambeh Anak Sarawak Renggat Ke-12 di Palan Mandang enggau Dagang Entarabansa Malaysia (MITEC) ditu tadi.