Anak Simanggang berasai temegah

“Semua peranak Simanggang tentu berasai temegah sereta meri ‘terima kasih’ besai ngagai Perintah Kerajaan Sarawak ke udah setuju ngemendarka ngena nama nya.”

SIMANGGANG: Pengawa nukar baru nama mengeri Sri Aman ngagai Simanggang nitihka udah digerah Kepala Menteri Datuk Patinggi Abang Johari Tun Openg kebendar ngembuan reti ke chukup besai.

Kaban Parlimen Batang Lupar Dato Sri Rohani Abdul Karim madah, semua peranak Simanggang tentu berasai temegah sereta meri ‘terima kasih’ besai ngagai Perintah Kerajaan Sarawak ke udah setuju ngemendarka ngena nama nya.

Ku iya, nama Simanggang endang nama asal enggau ngena baru nama nya meri siti kelai baru ngagai peranak mengeri Benak Malaysia tu.

“Aku ngarika semua peranak Mengeri Simanggang meri terima kasih ngagai Abang Johari.

“Aku empu ke nyadi siku ari orang ke ada ba Simanggang tentu nyukung pekara tu,” ku iya madah ngagai Suara Sarawak ditu kemari.

Ku iya, pengudah merdeka Sarawak bisi penyarut enggau Indonesia lalu Simanggang napi laya ke chukup besai dibanding enggau sitak bukai.

“Nya alai, kena 13 Oktober 1973 Kepala Menteri Datuk Abdul Rahman Yaakub (maya nya) nerima surat ari Direktor Parti Komunis Kalimantan Utara (Paraku) minta ngetuka penyarut nya.”

“Surat Deklarasi Sri Aman udah disain kena 21 Oktober 1973 bepalan ba Rumah Segi Lapan (diatu dikumbai Rumah Sri Aman) lalu nama Simanggang ditukar ngagai Sri Aman dikena ngelai Sempekat Likun nya,” ku iya.

Dulu ari nya, Rohani bekunsika tusun perintah Sri Aman lalu ku iya Perintah Brooke merintah Sarawak pengelama 100 tahun kenyau ari taun 1841 nyentuk 1941.

Kenu ku iya, Rajah Charles Brooke nempa tiga sitak dikena neduhka penyarut lalu genap sitak betuaika siku Residen (pengari Rajah) seraya dibantai Pemesai Pelilih Menua.

Dikena negapka kuasa, dia Perintah Brooke ngaga kuta ba tebing sungai ke engkeman lalu kena 1849, Kubu James didiri ba Nanga Skrang. Tang tumpur urung taun 1864 labu kereban iya dibai ngagai Simanggang.

Ba taun ke sebaka, Kubu James digaga baru ba Simanggang, tang nadai ngembuan nama ungkup beberapa taun.

Nyentuk taun 1870, kuta nya diberi nama Kubu Alice beserimbai enggau penatai Permaisuri Margaret Alice di Sarawak.

Udah nya, kena 1 Jun 1873, sistem merintah Residen ungkup sitak kedua ditumbuhka nengah Residen Keterubah James Brooke Cruickshank.

Lepas serakup Malaysia ditumbuh, dia Perintah Sarawak ngetanka sistem merintah bagi menua.

Nangkan nya, kena Mac 2002, perintah Sri Aman diatur baru lalu Pelilih Betong diangkat nyadi Bagi Menua ke-11 di Sarawak.

Suara Sarawak