Anang begelumu ba rumah panjai sekumbang timpuh PKP

KUCHING: Peranak ba rumah panjai dilalau seruran besabar enggau anang ngereja aktiviti bukai sekumbang timpuh Atur Mindah Betagang (PKP) ba kandang menua sida.

Chairman Komiti Penyangga Penusah Nengeri Sarawak (JPBNS), Datuk Amar Douglas Uggah Embas madahka peranak rumah panjai napi penusah maya timpuh pemindah ditagang pengelama 14 hari.

Kebuah pia ku Uggah, tebal agi peranak mesti mindah ke bukai laban gawa.

“Nya alai, aku ngarapka peranak ba rumah panjai seruran sabar enggau meri kerejasama ngambi nyaga pengelikun enggau pengerai kita sereta kita sebilik di rumah panjai nya,” ku Uggah.

Uggah mansutka jaku nya lebuh aum pemberita Covid-19 di Begunan Dun Lama, ditu lemai kemari.

Ku Uggah ti mega Sapit Kepala Menteri, peranak rumah panjai enda dikemendar mindah ari rumah panjai nyengkaum meli pemakai lebuh atur mindah betagang diterit.

Ku iya, raban penyangga penusah deka ngantu semua bantu pemakai ba timpuh 14 hari nya ngagai genap rumah panjai ti diterit atur nyekat pejalai.

“Pia mega, kita enda dikemendar begelumu di ruai tauka dalam bilik sepiak.

“Enti kita berandau enggau dalam bilik ke mayuh orang enggau siku ari sida nya sakit tau ngasuh Covid-19 ngerekai,” ku Uggah nyemetak madah.

Iya mega madahka ensanus bisi 74 kes ari sebuah rumah panjai laban enda nitihka gerah lebuh enda diasuh ngatur aktiviti.

Uggah mega madahka kes positif Covid-19 majak ngerekai di rumah panjai dibanding suba rumah panjai mengkang ba status gadung sereta likun.

“Tang ukai reti kes positif semina dirikodka ba rumah panjai laban ba mengeri baka Sibu mega ngerikod mayuh kes positif enggau peranak rumah panjai mega nurun ke pasar.

“Nya kebuah, kitai minta rayat meretika pekara tu laban enti kita enda begelumu enggau nadai program ke tau ngasuh begelumu, kitai engka ulih nagang pengerekai Covid-19 tu,” terang Uggah.