Anang enda belajar ari sejarah

Maya agi sekula sekondari suba, siti ari mata pelajar ke pemadu dikerinduka aku iya nya sejarah. Bepun ari Pom 1 nyentuk ngagai Pom 6 pemutus peresa ke dijapai aku ari mata pelajar tu endang jarang ngasaka ati seruran bulih mark ke tinggi laban aku sigi rindu macha jerita sejarah menua enggau bansa.

Nitihka penemu siku orang ke tebangkar ba penemu sejarah ba duya tu iya nya Marcus Tulius Circero madahka sejarah (historia) tu bisi ngundan lima batang pekara pugu.

Kesatu sejarah tu dikumbai saksi jeman, kedua sejarah siti gupung panchar pekara ke amat nyadi. Ketiga sejarah tu ku iya, pengingat pasal pengidup kelia munya. Keempat sejarah nyadi pengajar pengidup enggau kelima sejarah siti pesan ari jeman ke dulu suba.

Bepelasarka lima pekara pugu nya tadi, kitai ke maya hari tu enda tau enda nemu meretika sejarah bansa, aki ini, adat, daya idup enggau pengarap lama kitai empu nyadika pengajar dikena kitai ngulihka mayuh agi pemujur pemansang tauka juluk ati ungkup bansa enggau menua.

Siti ari sejarah bansa kitai Iban ke endang diaku semua orang ba dunya iya nya kala nyadi pengayau tebilang. Nitihka penerang siku penginjil ari menua Eropah, benama Van Hulten (1983) kala nyebut munyi tu ‘Zij waren vroeger de echte koppensnellers…Als er ergens een Iban zich vertoond had, was men daar wel op zijin hoede. Toch zijn ook deze Daya’s ontzettend sympatiek, vooral eigenlijk omdat zij zo zorgelooos en onbekommerd door het gaan.”

Reti nya, ku iya kenyau ari jeman kelia, orang Iban pengayau tebilang. Sida bisi ba dedini endur. Enti Iban udah deka ngering diri ba siti endur, dia sida deka beamat-amat ngetanka menua nya.

Taja pia, orang Iban bansa ke siru, kebuah pia laban sida deka ke pengingat ti lantang sereta enda kiruhka pengawa orang bukai. Tang sekali sida dikachau tauka dipenyai, orang Iban sigi ngerengkang.

Nya alai, lebuh ngelansa sentang sejarah pemindah bansa Iban di Borneo, nitihka penerang ari siti portal berita ari menua sepiak (Indonesia) iya nya YTPrayeh.com madah pemungkal pemindah kitai Iban bisi tiga renggat.

Keterubah pemindah ari menua asal ke dikumbai Tampun Juah, dalam kurun ke-13 ngili Sungai Sekayam, rembus ke kiba Batang Ai Kapaus. Tang diatu menua Tampun Juah bepalan ba menua Segumon, Sengkayam Hulu di Mongkos, adan entara menua Sarawak-Indonesia.

Kenu ku jerita, bisi tiga kali menua Tampuh Juah deka dialahka munsuh ngujungka raban Iban ke nguan menua nya mindah ngiga pengidup ke lebih meruan nyentukka mujur rembus di menua Batang Lupar-Lubok Antu.

Pemindah kedua, bisi tepejuh ke Sungai Ketungau ti bisi bepati enggau Sungai Kapuas. Tang bisi penusah besai nuntung lebuh nguan menua tu iya nya ampuh bah lalu ngujungka Iban terus mindah lalu raban sida tu dikumbai Ketungau Tasik.

Pemindah ketiga berebak enggau jeman penatai Brooke ke Sarawak. Jeman tu bala Iban endang udah bisi nguan menua Sarawak enggau Brunei. Ketuai ke ngiring Iban maya tu iya nya Singalang Burong, siku ketuai ke chukup kering sereta berantu.

Nama Singalang Burong chukup tampak sereta mayuh ditulis raban penulis ba bup litericha nyentukka iya digelar Petara Kayau (Sandin, 1977) nengah Gawai Burong.

Siku petara ke dipechaya tau datai nulung mandung raban Iban ba semua bansa pengawa ngayau enti udah dipegawai sereta dikangau enggau chukup piring enggau ading. Ambika chunto, jeman pengawa ngayau menua Madjang, siku bujang berani Iban ke tebilang ari Simanggang kelia benama Kilat bisi ditulung semengat Singalang Burong.

Diatu dunya udah jauh lantang sereta likun, udah meruan bisi undang-undang semua kitai bansa mayuh udah ngeleda ari bemacham sukut sekalika nya ba pekara pelajar, ekonomi, politik enggau ke bukai kitai terus nyingkang titihka pemansang bansa tauka pusin jeman.

Siku tokoh Dayak ti kala nyadi Gabenor Kalimantan Barat, Indonesia Dr Corniles M.H suah nepang rayat mayuh enggau genteran jaku tu, ‘Kalau takut jangan berani-berani dan kalau berani jangan takut-takut.’

Arapka kitai Dayak bela meretika sejarah diri ke pemaik bansa dudi hari sereta perundingka mih jaku lalau tu lebih agi lebuh dipilih nyadi ketuai ba dedini endur anang enda beamat-amat ngereja utai awakka kitai seruran dipebasa.

Suara Sarawak