SARATOK: Genap rumah panjai enggau genturung pendiau nyengkaum rumah nyembuah patut disikap perengkaguna pengerara api.
Sapit Menteri Pengeluar Kuasa enggau Pengeraja Asal, Ali Biju madah, bala tuai rumah tauka ketuai ruang bilik tau nganjung peminta ngagai Palan Servis Komuniti Sitak Parlimen Saratok ungkup tuju nya.
Ku iya, penyampau perengka pengerara api diberi mega bepanggai ba pemanjai rumah panjai tauka pemayuh rumah ba genturung pendiau dia.
“Ambika chunto, tuai rumah tau ngarika rayat iya minta perengka tu dikena nyikap diri napi sebarang penusah ngenyit ke tau nyadi sebarang maya.
“Abis nadai, enti bisi perengka tu, sida ulih nagang penusah ari nyerarai ngagai endur bukai ngujungka penusah besai nyadi.
“Aku minta kita anang enggai nganjung peminta ngagai palan servis laban tu ungkup pengelikun kita serumah,” ku iya madah nyemetak.
Berebak enggau nya, Rumah Siti Zubaidah, Sungai Engkabang Roban udah nerima tiga unit perengka pengerara api seraya Rumah Krandang, Supok Asal Roban nerima dua unit perengka pengerara api ari palan servis ditu, pagi tadi.
Tuai Rumah Siti Zubaidah enggau Tuai Rumah Krandang meri besai terima kasih ngagai Ali laban udah nangkup peminta enggau semampai betatika pengelantang rayat.
