Anang guai pulai Sarawak

KUCHING: Rayat Sarawak ti diau ba nengeri luar dilalau ngambika anang guai pulai ke nengeri tu jam diatu.
Menteri Kaunsil Kandang Menua enggau Pengawa Berumah Datuk Sri Prof Sim Kui Hian madahka, taja pia sida ulih pulai ke Sarawak nyema bisi pekara ti enda ulih diseliahka.
“Diatu, rikod kes ninting hari kes di Malaysia manggai 2,000 enggau nya deka nyadi serius enti kes bisi nambah agi.
“Nya alai, sida ari Semenanjung Malaysia, Sabah, Labuan, Kalimantan enggau Indonesia enda ibuh datai ke Sarawak jam diatu enti nadai kebuah,” ku iya bejaku nengah pesan facebook, ensana.
Tandu iya mega, orang ti pulai ke Sarawak deka terus dikuarantin sepengelama 14 hari dikena nyeliahka kes majak niki di nengeri tu.
“Nyema kita tama ke Sarawak, kita mesti nyendiaka pemakai, bup enggau meda filem di Netflix dikena ngisi awak maya kuarantin pengelama 14 hari,” ku iya.
Berebak enggau nya, iya mega ngelalau ngambika rayat Sarawak enda ibuh bejalai ke Semenanjung Malaysia, Sabah, Labuan, Kalimantan enggau Indonesia enti nadai kebuah.
“Sida mega mesti besedia dipansik tauka peresa swab PCR nyema bisi peminta enti deka ke luar Sarawak enggau mesti besedia napi sebarang ubah atur ngenyit,” ku iya.
Dulu ari nya, kena 31 Disember 2020 enggau 1 Januari tu tadi, Malaysia ngerikodka kes Covid-19 nambah lebih ari 2,000 kes ninting hari.
Ketuai Direktor Pengerai Tan Sri Dr Noor Hisham Abdullah kena 2 Januari tu tadi madahka menua ngerikodka 2,295 kes Covid-19 baru lalu ngujungka penyampau orang ti dirampit ba menua tu nambah 117,373 kes naka tu.
Iya nandu, kes suman dirikodka pemadu tinggi di Malaysia kenyau penyakit nya ngerekai iya nya 3,321 kes enggau penyampau kes suman di menua tu bisi 94,492 kes tauka 80.5 peratus.

Suara Sarawak