KUALA LUMPUR: Soldadu Langit Diraja Malaysia (TUDM) deka bejalaika pengawa Eksesais Ababil 2021 ba Pengkalan Langit Labuan enggau Kota Belud berengkah 7 nyentuk 17 September tu mungkur kandang langit Borneo enggau kandang tasik ke besemak.

Nampung penerang dibantaika Bernama, TUDM nengah sebengkah penerang kemari madahka pengawa eksesais nya dikena beratika pengelanchat raban pilot TUDM, kaban soldadu khas TUDM sereta raban logistik dalam bejalaika tanggungpengawa nyaga pengelikun menua.

“Kelimpah nya, eksesais nya mega dikena ngujika kereban senyata enggau penyikap TUDM dalam bejalaika pengawa ke mungkur pengawa nguna bilun perang, kereban pengangkut enggau bilun engkabang.

“Sekumbang pengawa eksesais nya dipejalai, bilun-bilun TUDM disadang deka terebai baruh ba sekeda endur ke udah digazet endur sida belatih,” ku penerang nya.

TUDM mega ngelalau mensia mayuh anang irau nyema sida bisi tepedaka bilun soldadu langit terebai baruh sekumbang timpuh belatih nya.