Anang jera ke Sarawak

KUCHING: “Anang jera datai ke Sarawak,” ku Kepala Menteri Datuk Patinggi Abang Johari Tun Openg ngagai Menteri Besai Datuk Patinggi Tan Sri Muhyiddin Yassin.

Abang Johari madah munyi nya maya Program Merarau Tuai Begulai Enggau Rayat nyerumba penemuai gawa dua hari Muhyiddin ke Sarawak, ditu ensana.

“Terima kasih Muhyiddin laban udah limpang datai ke nengeri tu, orang Sarawak madah anang jera (leju).

“Datai mih kitu baru ke Sarawak lalu kitai deka neruska pengawa besaup ngemansangka nengeri tu,” ku iya.

Kenu ku Abang Johari, ba penemuai dua hari nya Muhyiddin udah mendingka penerang pasal juluk perintah nengeri nuju 2030 sereta betemu
enggau mensia mayuh di Sarawak nyengkaum raban orang gawa perintah sereta raban enda bidik lansik ba Samarahan.

“Mulaika pengingat maya aku enggau Muhyiddin agi nyadi nembiak PBB enggau UMNO kelia, kami dua kala bemarin ba Batang Ai, Lubok Antu lalu udah nya iya suah amat datai ke Sarawak.

“Reti nya, Muhyiddin chukup ngelala nengeri tu ari ke diperagam kitai sereta iya nemu penyadi kitai ditu.
“Nya alai, aku andal iya deka nyaga nama utai ke bisi ba nengeri kitai tu, tambah mega Sarawak tu baka rumah lumur dua iya,” ku iya.

Berebak enggau nya, Abang Johari ke mega Chairman Gabungan Parti Sarawak (GPS) nyemetak madah perintah nengeri deka terus nentuka penegap politik ba nengeri tu tejamin.

“Nyema Perintah Sarawak pambar tentu Perintah Besai ngasaika pangka, nya alai beguna amat kitai ngetanka penegap tu awakka ulih mantu ba sukut pemujur atur ba renggat perintah besai.

“Ba Sarawak kitai bisi formula enggau chara diri empu, tambah mega kitai ngemeranka atur ke mungkur semua ngujungka kitai ulih ngatur nengeri tu enggau manah ari suba nyentuk ke diatu.

“Nya alai, kitai mega deka perintah menua tu tegap,” ku iya.

Abang Johari meri terima kasih laban rayat Sarawak ngembuan penyerakup sereta bisi pemereti ati begulai enggau pangan diri dalam mayuh bansa ngemansangka nengeri tu.

Ku iya, Sarawak ngembuan juluk deka meda nengeri tu mansang sebela ba semua sukut nyengkaum nyaga rampa menua nengah chara nanam 35 juta kayu dalam timpuh lima taun.

Suara Sarawak