Anang kakang nerima tuchuk vaksin Covid-19

SARATOK: Opis Pengerai Malaysia (KKM) Bagi menua Betong deka nusun program meri penerang ngagai mensia mayuh bekaul enggau pengawa meri vaksin Covid-19.

Direktor Opis Pengerai Bagi Betong,Dr Johnny Pangkas madah tuju pengawa tu beguna amat ngambika mensia mayuh lebih mereti pasal vaksin tu enggau enda berasai takut datai betuchuk.

“Aku nemu,mensia mayuh agi bisi kakang ati deka nerima tuchuk vaksin, tu nyangka sida apin bisi penerang ti silik diberi bekaul enggau vaksin tu.

“Nya alai, kami (KKM Betong) merambu deka ngatur program meri penerang ngagai mensia mayuh bekaul enggau pemanah ngambi tuchuk vaksin Covi-19,” ku iya maya dirandau Suara Sarawak ba opis iya di Betong kemari.

Berebak enggau nya, iya madah naka tu nadai pekara ke enda manah ditemu nyadi ba sida ke udah nerima tuchuk vaksin nya. Tuchuk vaksin tu kebendar dikena kitai nyaga diri empu enggau orang bukai kelimpah dikena mutuska pengerekai igi penyakit Covid-19.

Ungkup rikod, naka tu bisi 612 dos vaksin Covid-19 udah dituchuk ngagai raban Terabai Komuniti mungkur bala staf KKM enggau ke ukai staf KKM ba Betong.

Suara Sarawak