Anang kelalu andal, gawa bebendar agi

KUCHING: Komiti Parti Pesaka Bumiputera Bersatu (PBB) Pampang Pantai Damai enda tau kelalu andal dikena napi Pengawa Bepilih Besai Nengeri Ke-12 (PRN12) tu ila.

Mandal Presiden PBB Datuk Dr Abdul Rahman Junaidi madah, genap komiti sekalika ba renggat pampang tauka pati patut terus gawa bebendar.

Kenu ku iya ke mega Menteri Muda Utiliti (Bekal Ai), pemutus nyulut ke dijapai ba pengawa bepilih sebedau tu enda patut nyadika tiang sukat endur bala komiti diau diri.

“Kitai enda ulih kelalu andal (menang) laban nya deka meri penanggul ngagai kitai. Anang guai ngasaika diri ulih menang ba pengawa bepilih deka datai lalu kitai patut gawa bebendar agi,”ku iya.

Iya ke mega Adun Pantai Damai madah munyi nya maya nangguhka Bengkel Pengawa Bepilih Besai Nengeri Ke-12 GPS-PBB Pampang N.4 Pantai Damai kemari.

Dr Abdul Rahman madah, penyikap napi PRN12 kebendar udah berengkah kenyau Disember 2019.

“Bemacham bengkel, seminar enggau randau udah diatur dikena nerang silik enggau nyikap bala komiti,” ku iya.

Nangkan ke nya, iya madah diri nerima pemutus ke udah digaga Komiti Pengawa Bepilih Besai (SPR) ti nangguhka undi ungkup nembiak beumur 18 taun.

“Pemutus nya nadai nagang kitai terus ngerejister pengundi baru. Tang taja pia kitai udah mayuh ngerejister bala pengundi biak dalam tiga ngagai empat taun tu tadi lalu sida endang tegap nyukung PBB ditu.

“Sitak kitai tu bisi 5,000 iku kaban PBB ke bedau ngerejister diri nyadi pengundi lali kitai deka terus bejalaika pengawa ngerejister sida,” ku iya.

Sama bisi datai pengelicha Dato Awang Bemee Ali Basah, Datu Takun Sunggah enggau Dato Benjamin Hasbie.

Suara Sarawak