KUCHING: Parti enggau kaban politik mesti fokus ngagai penegap politik, penyerakup bansa enggau mulaika pemanah ekonomi kelimpah ekonomi tegap, pia ku Ketuai Raban Indu Parti Pesaka Bumiputera Bersatu (PWPBB) Datuk Seri Fatimah Abdullah.
Ku Fatimah, PWPBB enda setuju enggau pengawa Presiden Parti Keadilan Rakyat (PKR) Datuk Seri Anwar Ibrahim ti madahka diri bulih sukung tegut numbuhka Perintah Besai ke baru.
“Ulah iya ngasuh rayat saru penemu lalu dagang dalam menua diatu ba timpuh dikemanah baru pengudah empas pandemik Covid-19 ba selampur menua,”ku iya meri penerang, ditu tadi.
Pia mega ku iya, kaban politik baka Anwar mesti nagang pengamu diri deka bekuasa lalu nejuka rayat menua menua belelak ari berundingka politik ti tau ngasuh rayat pambar.
“Abis nadai, rayat ulih ngatika diri pengudah pengerekai Covid-19 ke apin ditemu punas.
“Nyadi siku ketuai, Datuk Seri Anwar Ibrahim mesti nemu pekara pemadu manah ungkup menua enggau rayat sereta anang kelalu gagit deka nyadi Menteri Besai,” ku iya nyemetak madah.
Fatimah madah, ulah Anwar nya tau meri penusah ba pengidup rayat pasal pekara politik ti enda menuku.
Dulu ari nya, Anwar madahka diri bulih sukung tegut ari kaban parlimen numbuhka Perintah Besai ke baru.
Nya alai ku Anwar, ari majoriti enggau sukung tegut diterima iya, Perintah Besai dipegai Menteri Besai Tan Sri Muhyiddin Yassin udah labuh.
