Anang laun rejista ngundi

KUCHING: Sepenyampau 3.8 juta rayat Malaysia bedau rejita nyadi pengundi taja udah manggai umur ngundi.

Kenu ku Chairman Komiti Besai Pengawa Bepilih Azhar Azizan Harun, sida ti beumur 21 taun enggau tuai agi patut rejista nyadi pengundi sereta dipinta anang kelalu laun rejista.

Ku iya, atur pejalai rejista nyadi pengundi nadai mayuh kelikuh enggau enda begunaka timpuh ti lama.

Pia mega ku Azhar, SPR deka ngatur kimpin besai meransang bala pengundi kelebih agi raban nembiak rejista nyadi pengundi.

“Anang nganti nyau ujung hari rejista nyadi pengundi laban tu nadai ngemai sebarang penguntung.

“Kitai enggai ninga sebana madahka diri asa enda ulih ngundi laban rejista kelalu laun,” ku iya madah nyemetak.

Iya mansutka jaku nya ba aum media di Politenik Kuching ditu tadi.

Ba lansa sama ku Azhar, SPR seruran nyikap diri sereta sedia napi PRN ti deka diatur sebarang maya.

Ku iya, SPR semina nganti hari bulan enggau jam ungkup PRN ditetap lalu rayat Sarawak ti apin rejista nyadi pengundi diperansang rejista nyadi pengundi.

Azhar Azizan Harun (tengah) nerang pekara bekaul enggau SPR ba aum media di Politeknik Kuching tadi.