Anang leju mantu orang tusah

KUCHING: Program meri bantu ngagai orang ti begunaka bantu mengkang dipejalai Gerempung Rama Enggau Pengintu Pengelantang Kota Padawan taja napi pemar ngiga pemeri belanja.
Chairman Kaunsil Kandang Menua Padawan (MPP) Lo Khere Chiang madahka empas ari pengerekai Covid-19 serikat besai tauka orang dagang napi pengerugi ba dagang sida.
“Mayuh dagang rugi ketegal Covid-19, nya alai enda muntang endur kitai ngiga bantu tauka penaja baka ti digaga sebedau Covid-19.
“Tang aku gaga meda gerempung tu enda ngetu ngulihka bantu ngagai orang dagang tauka pemeri belanja awakka sida ulih mantu meri barang baka telu, berau enggau barang pemun ke bukai,” ku iya.
Khere Chiang bejaku munyi nya ngagai pemberita rambau Program Pemansang Komuniti Projek Rayat di Balai Mensia Mayuh SJK Chung Hua Batu 10 ditu, kemari.
Ku iya, penyiru rayat dalam mantu raban ti diselinting patut dichuan orang bukai awakka sama bulih pengelantang.
“Aku ngarapka orang dagang enggau mensia mayuh ti ulih meri bantu anang berasai leju mantu orang tusah.
“Pia mega, anang enda nyaga pengerai diri kelebih agi kemari (ensana) 55 kes positif Covid-19 dirikodka lalu semilan rumah panjai di sekat,” ku iya.
Kemari, urung 40 iku indai tunggal, orang tuai enggau Orang Nyelai Pendiau (OKU) nerima bantu barang pemakai baka telu, berau, gula enggau ke bukai.
Raban ti diselinting gerempung nya sekali tu iya nya komuniti China di genturung MPP.
Sama bisi datai Chairman Gerempung Rama Enggau Pengintu Pengelantang Kota Padawan Pui Ghin Chin enggau bala bukai.