Anang leju nyukung raban D’Crystal

Lagu Atas Nama Pengerindu ti disadaka raban band D’Crystal mengkang enda beginsit ari penuduk lumur empat taja baru 10 minggu dalam Tusun Sapa Juara (CSJ) WaiFM kenyau hari keterubah dipasukka ba bulan Januari tu tadi.

Ketuai Raban ke mega Vokalis D’Crystal Harry meri terima kasih ngagai semua peminat sida laban ke seruran nyukung sereta ngujungka lagu nya terus beretan ba CJS.

“Ngarika raban band,aku meri besai terima kasih ngagai mensia mayuh lebih agi nuju peminat D’Crystal empu ti semampai enda leju nyukung sereta ngundi lagu kami.

“Juluk ati endang deka meda lagu tu bulih lalu mujur nyadi champion ba pekit ke diatur program stesyen radio tu.

“Nya alai,sukung enggau undi ari bala peminat ngagai lagu Atas Nama Pengerindu chukup lalu besai bendar reti ba kami,”ku Harry.

Ungkup penemu, kelimpah beretan ba Tusun Sapa Juara (CSJ) WaiFM, lagu tu mega udah “nyadi raja” ba Tusun Lagu Tebilang Cats (CatFM) enggau pengelama 14 minggu dalam program tu.

Berita pemadu baru ari raban D’Crystal diatu sida benung dalam perambu deka ngaga dua iti lagu baru ke berentak Agogo tauka Twist sereta Balada.

Siti lagu rumpas ari raban D’Crystal ke diberima Kemayang Nuan diatu udah dipeda urung sejuta iku orang ba Youtube.

Ngelansa pekara bekaul, siku ari raban band tu iya nya penulis Novel Atas Nama Pengerindu, Jerryson Chua tauka dikanggau Jerryson Cpyrian madah 100 iti bup novel ke ditengkebang iya udah abis dijual.

Kebendar novel 100 iti nya endang dichelak ungkup bala bakih enggau peminat ke semak aja lalu novel tu abis dijual dalam timpuh sebulan. Udah tu ila, pengawa nyual novel tu ngagai mensia mayuh deka berengkah baru ba pun bulan April.

Harry
LAKU…Novel Atas Nama Pengerindu.

Suara Sarawak