Anang lembau betanya enggau LKM

KOTA SAMARAHAN: Pedagang koko ti deka ngeluarka produk mata diperansang anang lembau betemu enggau Kaunsil Koko Malaysia (LKM) ngambi ngulihka sanding penemu enggau bantu.

Sapit Menteri Pengawa Bekebun enggau Komoditi, Willie Mongin madahka pedagang ba Sarawak tau betemu enggau pegawai ba LKM Kota Samarahan ngambi berandauka pekara tu.

“Pengawa baka tu mega mantu kitai ngelala pedagang ngambi sama ngemansangka industri koko ba menua tu enggau di Malaysia,” terang iya.

Willie mansutka jaku nya ba aum pemberita pengudah bejadika sebengkah pengawa di Palan Pemansik enggau Pemansang Koko, LKM Kota Samarahan, ditu ensanus.

Nambahka nya ku iya, Perintah Besai udah ngemendarka agih belanja RM21 juta dalam Langgur Pemansang Malaysia Lumpar Ke-12 (RMK-12) ungkup sekeda program nanam koko ngaul pekebun baru enggau bantu kereban betanam betupi.

“Aku mega minta semua rayat Sarawak ti bisi tanah puang dalam kluster koko baka Padawan, Serian, Tebedu Asajaya enggau Kuching ngaul sitak Bau tau datai kitu ngambi kami mantu enggau skim ti udah disedia,” terang iya.

Iya madahka pengawa tu deka mantu pedagang koko ba renggat produk udah tembu ngambi ngerembaika produk enggau nambahka pemansut produk koko.

Berebak enggau nya, Willie madahka kualiti koko di Sarawak entara koko pemadu manah ba dunya dataika iya kala ngempu dua anugerah.

Ke rikod, pemansut koko ba Sarawak dalam taun 2019 nya urung 148 ngagai 150 tan lalu bisi 14 iku pedagang coklat di Sarawak.

Sama datai Direktor Teknologi Huluan Koko LKM ti mega Pengatur Palan Pemansik enggau Pemansang Koko, Kota Samarahan Haya Ramba enggau Pegawai Pekara Ekonomi LKM, Kota Samarahan Abdul Karim Che Hamid.