Anang lembau nurun belatih ungkup Para Sukma

KUCHING: Dato anak Lakok, 45 meransang bala bakih Para Nyemerai Lumba Malaysia (Sukma) bela nguna peluang timpuh panjai napi Sukma 2022 dikena belatih enggau manah.
Atlit Para Nyemerai Kategori S10 (puntul kaki sepiak) ti kala ngarika Malaysia ba Lumba Asean tu mega meransang bala bakih atlit anang lembau nurun ke pegung nyemerai abis nadai dua kali seminggu.
“Diatu mih maya kitai belatih bebendar laban timpuh Sukma tu agi lama. Ba aku empu sigi enda kala tinggal nurun belatih lebuh dikangau jurulatih nurun ke pegung nyemerai ba Kompleks Lumba Nembiak ditu.
“Kitai ngarapka pandemik Covid-19 tu jampat pukas awakka lumba tu nadai penanggul diatu,” ku iya maya dirandau Suara Sarawak ba palan endur iya gawa ngaga kaki palsu di Jalai Tun Ahmad Zaidi Adruce, ditu apin lama ke udah.
Peranak asal ari Rumah Lawai, Kpg Selidong Medamit, Limbang tu mega siku orang ke landik ngaga kaki pelesu kelimpah ari tegar nyemerai.

Lakok benung ngaga kaki pelesu nitihka peminta bala penguna.

Ngelansa japai ba lumba Sukma, Dato siku ari atlit ke chukup nyulut lalu semampai pulai mai midul ungkup Sarawak kenyau ari nyereta Sukma 2000.
Ba Sukma Perak taun 2018 sebedau tu, Dato mujur mai pulai dua midul emas enggau tiga midul pirak. Siti ari midul emas nya, diulih ba lumba nyemerai 400 meter kategori S9 ti bela ngemataka iya mujur nempa rikod baru Para Sukma enggau pengelaju 6.17.66 sikin.
Nya alai, ba Sukma ti deka datai Dato andal deka terus teulihka pemujur ke lebih nyulut laban nya nyangka peluang kepenudi endur iya nyaup ngangkatka nama Sarawak nyadi champion penuh Sukma ketegal umur ti majak lunggar.
Ungkup penemu nengeri Sarawak mujur ngetanka rikod champion 13 kali bejurut ba lumba Para Sukma kenyau pekit tu diatur di Johor taun 1994, Sarawak (1996), Selangor (1998), Kuala Lumpur (2000), Sabah (2002), Nengeri Sembilan (2004), Kedah (2006), Kuala Lumpur (2008), Melaka (2010), Pahang (2012), Perlis (2014), Sarawak (2016) enggau Perak (2018).

Suara Sarawak