Berengkah rindu nero bepun ari dikena ngisi jam lepa ngujungka pengawa nya kelala-lama nyau nyadi dagang sereta ulih dikena nambahka penatai pemisi ngagai diri sebilik.
Lionel Frankie Juttie, 54, asal ari Nanga Graji, Betong ngembuan pengelandik nero mua mensia lalu diatu pengawa iya nya chukup mayuh nerima peminta ari mensia mayuh ke ngelala.
Sida Lionel menyadi bisi 12 iku lalu iya anak lumur dua bia. Apai iya benama Francis Juttie enggau indai iya, Bidah Ningkan.
Iya berengkah ngindik kaki ke sekula ba St Augustine, Betong ari Primari 1 sebedau ke nampung pelajar ba sekula ke sama ari Pom 1 nyentuk ke Pom 5.
LANDIK NERO
Maya dirandau Ruai, Suara Sarawak Lionel madah diri endang ngemeranka pengawa nero lebuh maya lepa kenyau ari sekula primari.
Ku Lionel, tiap kali iya nero ati iya berasai rindang sereta ransing.
“Runding puang lalu semina numpuka ngagai gambar ti deka didero aja.” Ku Lionel.
Lionel kala nguji enggau orang masuk pekit nero lalu ba pekit nya iya dipadu bulih gelar champion.
Lionel madahka siti asil dero iya ti pemadu dikesayauka iya lalu disimpan iya enggau manah iya nya gambar apai iya empu.
PEMINTA ARI PENGUNA
Sebedau tu Lionel semina rindu nero lebuh maya lepa aja, tang sekumbang ke napi penanggul Covid19 tu sereta diasuh bepekul ba rumah, dia iya suah agi nero lalu mandangka asil keranjai jari iya nya ba media rama.
Bekau ari nya, penguna media rama majak ngelala Lionel lalu sida muji asil keranjai jari iya ke alus sereta manah lalu sida berengkah nanya iya berapa rega diletakka iya ungkup siti asil dero.
Berindik ari nya, Lionel berengkah nerima mayuh peminta ari bala kaban ba media rama ti ngasuh iya nero gamal sida.
Lionel nerima peminta ukai semina ari menua Kuching tang mega nyau ka serata menua Sarawak.
Bisi mega bala minta Lionel nero gamal mua dikenaka pemeri tauka tanda kenang ba mayuh macam opis perintah.
“Rega diletak enda mar iya nya aku nitihka pemesai sereta ulih ditangkup semua orang,” ku Lionel lebuh ngelansa tanya rega asil keranjai jari iya.
Lionel nembuka siti asil dero pengelama sejam ngagai tiga jam aja.
DEKA MUKA STUDIO
Laban pengerindu ngagai pengawa nero lalu diatu nyau udah ditemu bala mayuh asil keranjai jari Lionel ti chukup manah, iya bisi nyimpan juluk ati deka bisi palan alai nero tauka studio kediri empu.
Naka tu semua bala ke kala ngasuh Lionel nero madah diri tepantup ati enggau asil jari iya.
“Barang sapa ti ngembuan pengelandik baik nero gamal mua tauka nero utai bukai, anang takut tauka malu mandangka asil jari diri ngagai bala mayuh laban nya ulih nyadika penatai pemisi kitai,” Ku peransang ari Lionel nuju orang bukai ke bisi ngembuan pengelandik baka iya.
Kelimpah ari nya, mensia mayuh ke bisi ati deka meda asil keranjai jari Lionel tau ngelawa Facebook iya empu Lionel Frankie Juttie.
