Ketegal minat bedagang, dia Angela Ngali ari Rumah Eddy Madang, Ulu Manding Pakan mai ati berani nguji ngaga kek enggau bouquet kenyau ari taun 2018.

“Bouqet nya mih utai keterubah digaga aku taun 2018 suba, baru taun tu aku belabuh enggau begagaka kek,” ku iya ngepunka randau enggau pengari Suara Sarawak.

Angela mega madahka diri kala ngulu kus ngaga kek enggau bouquet dikena nambahka anak penemu diri.

Berekat peransang ari diri sebilik enggau kaban belayan ngujungka iya terus chakah bejalaika pengawa bedagang mit.

“Terima kasih mega ngagai petunggal aku Setayler Saing ti semampai nyukung aku ba bidang tu,” ku tandu Angela.

PEMAR DITAPI

Genap pengawa tentu bisi pemar ditapi, baka nya mega Angela madah diri enda ulih lari penguji baka pemar begigaka perengka dikena ngaga kek enggau bouquet.

“Kekadang barang ke dibeli aku nengah chara online lubah amat datai nya ngasuh aku berumban ngereja tambah mega bala pemeli endang nganti utai diudar sida iya ba aku ulih tembu enggau lengkas.

“Enti meli perengka tu ba pasar, rega iya chukup mar dibanding enggau barang dibeli online baka barang pemalut bouquet,” ku iya.

Ba ngaga chuan kek enggau bouquet, semua nya datai ari kreativiti diri empu enggau nitihka peminta orang meli.

TIMBAL ARI PEMELI

“Kek ke pemadu laku naka tu iya nya kek bajet laban rega kek tu ulih dibeli semua orang, udah nya bouquet ke mayuh diudar penguna bouquet cokelat.

“Naka tu timbal ari pemeli chukup manah ngujungka aku ransing agi ngereja pengawa tu.

“Tebal agi sida madah diri tepantup ati enggay asil kek enggau bouquet ke digaga aku,” ku Angela.

Udah nya, Angela madahka diri deka muka kediri kedai kek kediri ngambi lantang endur nyual kek enggau bouquet.

“Arapka dagang mit aku tu semampai mujur lalu mega ulih nambahka penatai pemisi ungkup kami sebilik,” ku Angela.

Iya mega meransang orang ke ngembuan minat ke sebaka anang mudah mantul ati tauka malu ngerembaika penau diri.

“Anang malu ba pengawa dagang taja dagang kitai nya mit laban tu ulih mantu ruang bilik kitai ari sukut penatai pemisi.

“Liatka ati kitai dalam ngereja pengawa kelebih agi lebuh maya napi penguji lalu kemujurka mih minat kitai ba pekara ti dikerindu,” ku Angela.

Penerang silik pasal kek enggau bouqet digaga Angela ulih dipeda ba Facebook Angle Ngali tauka Whatsapp nuju lumur telefon 013-3006713.