PAKAN: AJ Truly Spices Enterprise udah mujur ngatur program ‘Kembara Kerjaya Belia’ ungkup nembiak ba Pakan sereta genturung menua ke semak ditu.

Program tu digulu raban nembiak tinbenung begigaka pengawa seraya nempa kaul enggau pangan diri.

Menijar serikat tu,Tedong anak Chakaw ngelalau bala raban nembiak anang enda ngiga pengawa dikena ngidupka diri.

“Tu mih maya kita bebendar ngiga pengawa dikena nyaup diri sebilik. Rebut peluang ke bisi disediaka perintah dikena ngubah pengidup diri,”ku iya.

Nangkanka nya mega,iya arapka bala nembiak besemekih nengah chara ke manah dikena ngayanka diri nangkup pengawa ti setipak enggau penau sereta pemandai.

“Sepengudah kita ningka nama utai disebut bala pengelicha ba program tu,aku aku arapka kita ransing ngereja sereta begigaka pengawa.Tau mega bekunsika penemu ngagai bala pangan sereta bekunsika sebarang pengawa puang.

“Raban rebak baru mesti nulung pangan ke bukai nyangka ila iya ke ditulung pan ulih nulung nuan enggau orang bukai mega,”ku iya.

Nangkan ke nya, Tedong meransang raban nembiak rebak baru anang mantul ngereja pengawa lalu anang putus pengarap ti nyema kurang nyulut ba pelajar.

“Mayuh palan pelajar bisi disedia perintah baka Palan Latih Industri (ILP),Palan Pengelandik Nembiak (IKBM) sereta ke bukai ulih endur ngansah pengelandik ngagai tikas ke tinggi,”ku iya.

Program ke diatur ba Nanga Litok Riverine Park nya digulu lebih ari 70 iku nembiak sereta nitihka Atur Pengawa Standard (SOP) ke udah ditetapka.

Dulu ari nya, Tedong ke mega Chairman PNRB Pakan Julau bisi nyuaka insentif pelajar ngagai nembiak ari Julau enggau Pakan ke mujur nampung pelajar ngagai Palan Pelajar Tinggi (IPT).

Entara nembiak ti nerima insentif nya Joshua Sibat anak Asun enggau Wesly Gayette anak Lawrence ari Pakan lalu ari Julau iya nya Vellareina Sudit anak Morris enggau Patrick Damu anak Mengga.