Anang mayuh leman mansutka i-sinar – Najib

KUCHING: Ex-Menteri Besai Datuk Seri Mohd Najib Tun Razak diperati terus ngansak Opis Wang Turu Pengereja Pengawa (KWSP) nginsil semua atur ti mayuh leman ngemansutka i-Sinar enggau lengkas.
Ba laman Facebook iya, Najib ngarapka atur i-sinar patut digaga sebaka enggau i-Lestari.
“Ukai nya deka ngambi semua. Semina manggai RM10,000 aja.
“Aku macha mayuh nya i-happy sehari tu, tang mayuh mega i-kecewa…gaga mih baka i-Lestari,” ku iya nengah siti posting urung pukul 11 pagi kemari.
Naka pukul 4.30 lemai, posting nya disadung 4,800 penguna Facebook sereta nerima 23,000 iti timbal sereta lebih 81,000 tanda rindu.
Ku iya, rayat lebih nemu utai ke nuntung sida.
“Rayat lebih nemu duit ke diambi sehari tu ulih dipulaika baru jemah enti ekonomi udah manah.
“Nya alai, anang enda arap ngagai rayat laban nya endang duit sida.
“Sapa ti ngasai diri begunaka belanja, tejuka sida ngambi mimit,” ku iya.
Kemari (4 Januari) iya nya hari keterubah meresa status peminta i-Sinar ungkup kategori satu pengudah peminta nya dibuka kenyau 21 Disember ke udah.
Taja pia, mayuh ti sebana laban duit ke dikearap nya ulih diguna maya tusah tang pedis diambi ketegal atur kelalu terit.