KUCHING: Rayat Sarawak ditangkan anang ngadai pengidup dudi hari enggau chara milih parti ti puntan nangkup peminta rayat enggau enda tetangkupka semaya ti digaga diri.
Kepala Menteri Datuk Patinggi Tan Sri Abang Johari Tun Openg madahka pekara tu kelebih agi enti milih parti ti bekaul enggau sida ti kala puntan megai perintah ke alai rayat patut meda pekara tu nyadi teladan.
“Nyadi rayat Sarawak, endang udah nyadi tanggungpengawa kita milih perintah ti ngemeratka enggau ngembuan tanggungpengawa dalam napi pemar jeman diatu enggau jeman ti deka datai.
“Nya endang ungkup nentuka pemansang enggau pengelantang Sarawak ti kitai sayau ulih diteruska,” ku iya.
Abang Johari bejaku munyi nya lebuh mantaika Manifesto GPS PRN-12 di Palan Aum Borneo Kuching (BCCK) ditu, ensana.
Ku Chairman GPS nya, sida ngeletakka pemansang pemun ti strategik nentuka pemansang Sarawak enda ngetu.
“Pengawa ngemansangka Sarawak semina ulih dijapai nyema GPS terus diberi mandat megai Perintah Sarawak nengah Pengawa Bepilih Besai Nengeri Ke-12 (PRN-12) tu.
“GPS deka nentuka nadai siku rayat Sarawak ditinggalka dalam ngasaika pemansang,” ku iya.
Iya madahka, raban tuai GPS ti bepenau, tegap, ngembuan integriti tinggi enggau rikod pengawa ti nyulut deka terus meri servis ti manah ngagai rayat Sarawak.
“Menua Sarawak ti deka datai ba jari kita. Kitai ngemansangka Sarawak nangah chuan kitai empu enggau semina kitai empu ulih ngintu pengelantang ti diasaika orang Sarawak.
“GPS begunaka sukung teguh rayat Sarawak. Sukung enggau undi meh GPS ungkup Sarawak ti tegap, likun enggau nyulut ngambika Sarawak ulih mansang manggai taun 2030,” ku iya.
