KUCHING: Anang nandu sejarah ti ulih ngerugi menua laban mayuh hak Sarawak deka lenyau ketegal pangka penumbuh Kaunsil Pengawa Nasional (Mageran) ti nganti Konstitusyen bekau ari atur bekurung ke dipejalai ba Malaysia kena 13 Mei 1969, ku Datuk Seri Wan Junaidi Tuanku Jaafar.
Menteri Pemansang Orang Dagang enggau Gerempung Kerejasama nya madah munyi nya lebuh diminta mantaika penemu iya pasal guna isu atur bekurung ketegal pengerekai igi penyakit Covid-19 ti nyerumba Pengawa Bepilih Besai Nengeri ke-12 (PRN-12).
Wan Junaidi ngasaika nadai pekara ti mejal atur bekurung dipejalai maya PRN-12 laban pengerekai igi penyakit nya agi ulih jaga tauka dipunaska enti Atur Pengawa Standard (SOP) dititih enggau manah.
“Aku enda berapa nemu tikas pengeruga nyentukka atur bekurung laban nya bepanggai ngagai komiti pengelikun menua.
“Tang, naka tu, bedau kala pengerekai penyakit nyadi ngujungka atur bekurung dipejalai ba dunya,” ku iya.
Iya bejaku munyi nya ngagai pemberita pengudah baum pasal Komiti Pengatur Kaul Entara Parti Komponen Gempung Parti Sarawak (GPS) di Jalai Kulas ditu, kemari.
Taja pia, Wan Junaidi madahka isu atur bekurung ulih dipansutka nyema bisi pemutus ari Yang Di-Pertuan Agong.
“Agong bisi kuasa mansutka gerah atur bekurung enti bisi pematut.
“Tang aku enda rinduka pekara nya laban ubah perintah menua ti bekaul enggau Parlimen enggau Konstitusyen deka tejanggal,” ku iya.
Kenu ku iya, pekara nya kala nyadi maya 13 Mei 1969 ti ngujungka ‘Ordinan Darurat Kuasa Pemadu Besai 1969 ‘dipejalai.
“Ordinan tu lalu ngasuh Perintah Besai ngambi asil minyak enggau gis di Sarawak ba baruh Petronas.
“Sida (Perintah Besai) enda ingat pasal Artikel 2 Konstitusyen Besai bekaul enggau hak Perintah Sarawak,” ku iya.
Wan Junaidi mega madah rayat Sarawak tentu enggai meda sejarah ke bakatu nyadi baru.
