Anang nangi berubat kemoterapi

Pesakit riman tusu

KUCHING: Mayuh orang indu ti kena penyakit riman tusu enda arapka berubat ngena chara kemoterapi laban ngumbai berubat chara nya tau ngasuh bebadi nyawa.

Ketuai Eksekutif Pansik Riman Malaysia (CRM) Profesor Datin Paduka Dr Teo Soo Hwang madahka nya ti ngasuh urung 55 ngagai 60 peratus bala sida ditemu kena riman ba renggat ti kepenudi.

“Kitai ngembuan perengkaguna pemadu manah dikena nyumanka penyakit riman tusu.

“Taja pia, mayuh orang ngerunding berubat ngena chara kemoterapi tu tau ngasuh bebadi nyawa lalu nya ngujungka sida berubat ngena chara bukai,” ku iya.

Soo Hwang bejaku munyi nya ba pengawa bejadika Palan Nyaga Riman Tusu (Breast Care Centre) di Sepital Besai Sarawak (SGH) ditu, kemari.

Ku iya, pesakit riman tusu terubah iya dikelala nengah tiga bansa raban.

“Raban ti keterubah sida ti enda nemu diri ditepan penyakit riman tusu lalu ngumbai penyakit nya enda balat.

“Sida tu nyamai dibai berubat sereta nitihka sanding penemu lutur.

“Raban ti kedua sida ti laun datai ke sepital sereta enda pechaya ke chara berubat kemoterapi laban ngumbai chara berubat tu tau naban ke nyawa,” ku iya.

Empas ari nya, ku iya orang ti ditepan penyakit nya jampat agi berubat chara bukai.

“Pia mega, raban ti ketiga sida ti nemu diri ditepan penyakit ruman tusu tang nadai belanja sereta datai ari ruang bilik ti mimit penatai pemisi.

“Sida tu patut dibantu ari mensia mayuh ngambika ulih berubat enggau jampat,” ku iya.

Breast Care Centre keterubah di SGH nya kemari dipenyadi bini Tuai Pemegai Menua Tun Abdul Taib Mahmud, Toh Puan Datuk Patinggi Raghad Kurdi Taib.

Kelimpah program bejadika Breast Care Centre, pengawa nyain Sempekat Pemerti Ati (MoU) entara Chair Person CRM Toh Puan Dr Aishah Ong enggau Direktor SGH Dr Chin Zin Hing.

Suara Sarawak