PAKAN: Rayat di menua pesisir endang enda kala dikelaungka ari pemansang, kenu ku Sapit Menteri Pengerai Malaysia Datuk Aaron Ago Dagang.

Ku Aaron, perintah endang naka ulih ngemansangka menua pesisir ngambika seraka pemansang enda jauh tinggal enggau sida ke diau di kandang mengeri.

Nya alai ku iya, mayuh macham pemansang udah dibai perintah ungkup rayat di menua pesisir sama bela ngasaika penyamai.

Aaron ti mega Kaban Parlimen Kanowit madah, iya ngarapka rayat nguna peluang tu enggau manah ti deka meri penguntung ngagai sida.

“Gunaka mih peluang tu enggau memanah lalu anang ninggalka diri ari peluang pemansang ti digaga perintah ungkup kita.

“Pia mega, kitai ulih ngemansangka Tanah Adat Bansa Asal (NCR) nyadika kebun tauka enggau pengawa bukai ngambika enda repa pia aja.

“Ambika asil ari tanah kitai tu tadi ulih nambahka penatai pemisi kitai lalu tu mega chara kitai ulih munaska penyeranta,” ku Aaron.

Iya ngenataika jaku tu lebuh diberi basa nyadi Tuai Pengabang sereta bejadika Pengerami Ngiling Tikai ti diatur Parti Rayat Sarawak (PRS) Pampang Pakan nengah kerejasama Komiti Pemansang enggau Pengelikun Genturung Pendiau (JKKK) Rumah Morris Nyalak Ili, apin lama ke udah.

Aaron mega madahka, apai indai patut ngemeratka pelajar sekula lalu pekara tu patut amat dikemansangka ungkup bala anak ngiga pemujur ba pengidup jemah ila.

Ku iya, pelajar tu chukup beguna amat dikena ngingkaska diri ari kandang penyeranta lalu mega ulih ngasuh pengidup kitai meruan.

Lebuh bekenang rega barang ti kelalu mar sereta rega komoditi ti enda tentu, iya ngarapka rayat landik bebelanja sereta liatka ati ba pengawa betanam betupi.

Ku tandu Aaron, kediatu Opis Menteri Pengerai Malaysia enggau naka bebendar nagang pengerekai igi penyakit Covid-19 lalu ngarapka penyakit tu ulih pukas.

Nya alai ku iya, ngarapka mensia mayuh semampai nyaga pengelikun enggau pengerai diri lalu titihka atur ti udah dipadahka perintah.

Bela dikenang Aaron iya nya bekaul chalun ti patut ngarika GPS ari PRS ba sitak Julau lalu iya nyukung penuh Salang dipilih nyadi chalun ba sitak tu.

Sama bisi datai ba pengerami tu iya nya Presiden PRS Datuk Joseph Salang Gandum, Tuai Nembiak PRS Datuk Snowdan Lawan, Kaban Kunsil Nengeri (Adun) Pelagus Wilson Nyabong Ijang, Adun Ngemah Anyi Jana, Adun Baleh Nicholas Kudi Jantai, Senator Datuk Seri Doris Sophia Brodi, Senator Rita Insol sereta mega raban PRS enggau rayat ke besemak pendiau.