KUCHING: Pengawa madamka Ujian Penilaian Sekolah Rendah (UPSR) patut digaga berenggat, ku Presiden Serakup Pengajar Bumiputera Sarawak (KGBS) Ahmad Malie.

Ku iya, KGBS nyukung perambu Opis Menteri Pelajar (KPM) ti deka madamka UPSR.

“Pengawa tu nadai nanggul kualiti pelajar menua tang bala pengajar ulih meri fokus ngajar genap subjek ngaul UPSR.

“Kitai ulih ngurangka penanggul runding ngagai bala pengajar enggau nembiak,” ku iya lebuh dirandau Suara Sarawak, tadi.

Ahmad madahka pekara nya mega deka meri pengelantang ngagai apai indai nembiak ti deka ngambi peresa UPSR.

“Taja pia, KGBS minta pengawa tu digaga berenggat ngambi bala pengajar, nembiak enggau apai indai ulih nerima belubah ubah sistem pelajar menua tu.

“Abis nadai, sida diberi peluang nyendiaka diri enggau ngatur baru nama bagi pengawa ke patut dipejalai pengudah peresa nya nadai agi ila,” ku iya.

Apin lama ke udah, KPM madahka sida benung ba renggat penudi mansik pengawa madamka UPSR.

Sapit Menteri Pelajar I Muslimin Yahaya madahka, pemutus bekaul enggau pekara nya deka digaga enda lama agi.