SADONG JAYA: Orang ke nyadi ketuai enda tau kelalu ngasai diri tinggi pangkat ari rayat, ku Datuk Amar Mohamad Asfia Awang Nassar.
Speaker Kunsil Nengeri (Dun) Sarawak nya madah, sida mega enda ibuh kelalu ngemeratka atur protokol enggau mida pangkat diri enggau rayat.
Kenu ku iya, pekara nya beguna amat dikena nentuka pemanah kaul seruran dijaga.
“Enti nadai ngira pangkat enggau nadai protokol, ‘insya-Allah’ ketuai nya deka lebih disayauka rayat.
“Nya mega deka negu ati rayat lalu enda ibuh dibayar ngena duit ringgit,” ku iya.
Iya madah munyi nya maya Program Pemesai Begulai Enggau Rayat Seraya Nyuaka Tulung Ngagai Masjid enggau Surau Ba Sitak N.24 Sadong Jaya di Masjid Darul Iman ditu kemari.
Ku iya, atur ti nadai ngemeratka protokol enggau pangkat nya ngujungka Adun Sadong Jaya Aidel Lariwoo chukup dikelala sereta dikerinduka rayat ba sitak nya.
“Anang nitih chara pegai British kelia laban sida endang ngemeratka pangkat enggau ngasai diri mesti dibasa.
“Taja pia, takah ke digaga nya kelama-lama deka ngurangka peneleba entara ketuai enggau rayat lalu kekadang tau ngasuh rayat begedi,” ku iya.
Ba pekara bekaul, Asfia bisi nyuaka tulung sepenyampau RM205,000 ungkup masjid enggau surau ba sitak Sadong Jaya.
Ari penyampau nya, 12 buah masjid bela nerima RM10,000 lalu 17 surau nerima RM5,000.