Anang nunu babas enti enggai dikompaun

KUCHING: Orang ngatika diri tauka raban bukai ti nunu babas sengapa deka dikompaun Kaunsil Pengeraja Asal enggau Rampa Menua (NREB) Sarawak.

Direktor Opis Bomba enggau Penyah Penusah Malaysia (JBPM) Sarawak PKPjB Khirudin Drahman @ Hussaini madah semua pekara bekaul deka diperatika NREB.

“Naka diatu, endang bisi kes udah dikompaun NREB, aku semina enda nemu berapa penyampau kompaun nya.

“Pemesai NREB mega madahka sida deka bekerejasama enggau Opis Tanah enggau Survei (JTS) beratika sapa bagi bempu tanah ngaul pekara nya,” ku iya.

Khirudin madah munyi nya lebuh dirandau pemberita pengudah nutup Aum Besai Raban Inovatif & Kreatif (KIK) renggat JBPM Sarawak 2019 di Galeri Pustaka Nengeri Sarawak ditu tadi.

PALAN MANDANG KIK… Khirudin ngabas palan eksibisyen KIK renggat JBPM Sarawak 2019 ba Galeri Pustaka Nengeri Sarawak ditu tadi.

Ku iya, piak NREB deka mansutka gerah bekaul enggau pekara nya lalu beratika atur sereta caj ti udah ditetap piak sida.

“Kitai ukai nagang pekara pemansang laban kitai enda ulih ngelaungka iya.

“Taja pia pemansang dipejalai patut ngena jalai ti betul lalu ukai semina deka ngelimat ungkus tang meri penanggul ngagai pekara bukai,” ku iya.

Ku Khirudin, kerejasama mensia mayuh chukup beguna laban pekara nya enda ulih diputar sida kediri.

“Sebarang advokasyen dikeluarka JBPM, aku ngarapka komuniti ulih nitihka semua atur nya.

“Kitai enggaika penusah ditapi taun 1997 nyadi baru,” ku iya.

Kena 19 September 1997, Sarawak dipadah nyadi ‘menua siga’ (darurat) keterubah dalam sejarah menua kitai.

Ba taun nya mega udah ngerikod penanggul besebun pemadu balat ke alai Indeks Pengamah Angin (IPU) nunjukka 625 iya nya jauh tinggi ari tikas tau munuh entara 301 ngagai 500.