Anang nutup 33 palan latih KKM

KUCHING: Perintah Besai dipinta anang nutup 33 buah palan latih ke dikuasa Opis Menteri Pengerai (KKM).

Mansutka pinta nya, Kongres Serakup Orang Gawa Perintah (CUEPACS) ngasai semua 33 palan latih mengkang diguna ba atur nempa raban orang ke landik ba pekara ke bekait enggau servis pengerai.

Presiden CUEPACS Datuk Azih Muda madah naka ke diatu, entara tujuh nyentuk ngagai semilan palan latih
udah ditutup lalu diubah tanggungpengawa di selampur menua.

“Semua institut tu nyendia palan endur orang gawa perintah kelebih agi sida ke gawa ba opis menteri pengerai enggau ijinsi ba opis kunsil kandang menua ngulu latih.

“Orang gawa dilatih ngambi tau ngembuan pengelandik tinggi sereta tegap besemekih enggau orang bukai,’ku iya.

Azih mansutka jaku nya ba aum pengarang berita pengudah bejadi Aum Deligit Tiga Taun Sekali 2016-2019 CUEPACS Sarawak di Kuching kemari.

Azih pechaya atur nutup palan nya deka meri penanggul ba atur nempa raban orang ke landik ba servis pengerai.

Ku iya, enti universiti dipilih nganti tanggungpengawa institut, universiti meseti nyendia kus ke engkeman ngambi ulih nempa raban orang ke megai ijazah tauka diploma universiti.

“Chara latih ba universiti enda sebaka enggau chara di 33 palan latih opis pengerai ti udah nyendia latih enggau manah.

“Semua palan tu enda patut ditutup, nanka aja ngambi ulih seruran nempa orang ke landik ti deka meri servis ngagai rayat,”ku Azih.

Ngenang isu ke bekait, Azih madah naka ke diatu penyampau orang gawa kelebih agi ba opis pengerai Sarawak mengkang kurang.

Iya madah spital baru di negeri tu mengkang begunaka orang gawa ke udah dilatih alai atur ngambi sida ke ba sepital lama gawa ba spital baru ukai runding ke manah.

“Enti ngambi sida ke ba sepital lama, atur deka ngurangka lutur, paramedik, indu misi enggau sida bukai ba klinik tauka spital,”tandu Azih.

Perintah meseti meretika diak raban orang tu meri servis ngagai rayat alai penyampau orang ti begunaka servis pengerai majak nambah.

Bela datai Presiden CUEPACS Sarawak Ahmad Malie.