Anang sengapa tuduh, tuai rumah sah tetap dibayar elaun

KUCHING:  Zuraida patut betemu sereta berandau kediri empu enggau Perintah Sarawak sebedau nyimpul penemu iya, ku Sapit Kepala Menteri ti mega nyadi Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas.

Uggah nimbal Menteri Pengawa Berumah enggau Kaunsil Kandang Menua Zuraida Kamaruddin ti madahka Perintah Sarawak patut meri elaun tuai rumah enggau profesional.

Ku iya, elaun tuai rumah di Sarawak endang dibagi enggau chara ti profesional.

“Sida (tuai rumah) nerima elaun sida belanggang bulan datai ngagai penembu timpuh sida gawa.

“Enti sida udah betemu enggau kami, kami nadai penanggul nyiri sida tu,” ku iya madah ba siti penerang berita.

Datuk Amar Douglas Uggah Embas

Nangkan nya ku Uggah, iya udah berandau enggau Residen Bagi Menua Bintulu bekaul enggau pekara tu.

“Iya madahka semua tuai rumah ti udah bisi setipikit ti sah aja udah nerima elaun sida.

“Sida tu mega dibayar ngena sistem gaji ti udah dipejalaika ba nengeri tu berengkah taun 2013,” ku iya.

Ku Uggah, Zuraida enda patut nuduh sida (Perintah Sarawak) bechiping dalam pengawa meri elaun ngagai tuai rumah.

“Iya madahka perintah Sarawak enda mayar elaun belanggang bulan laban sida (tuai rumah) enda diaku ketegal sida dichiri pengari ari Pakatan Harapan (PH).

“Baka ti dipadah aku tadi, Zuraida endang diterima mansutka penemu iya.

“Tang iya patut nemu pekara nya enggau silik sebedau iya mansutka jaku nya ngagai media lalu bejaika nama Perintah Sarawak,” ku Uggah.

Pagi kemari ba siti aum pemberita, Zuraida madahka Perintah Sarawak patut ngatur pengawa meri elaun tuai rumah enggau profesional.

Ku iya, iya bisi betemu enggau Gerempung Pengintu Pengelantang Rumah Panjai Bintulu ti madahka sida enda nerima elaun ari Perintah Sarawak ketegal sida dichiri pengari ari Pakatan Harapan (PH).