Anang sepeneka beambi ulih – Chong

KUCHING: Menteri Dagang Dalam Menua enggau Orang Bebelika Barang (KPDNHEP) beratka pekara rega barang niki di sitak Bario taja subsidi perengka pengangkut enggau tinda udah dikemendar.

Sapit Menteri iya Chong Chieng Jen madahka sida beratka pekara nya enti kunteriktor ti ngangkut barang ke Bario enda bejalaika pangku pengawa sida nitihka pematut taja udah dipadu gawa.

“Kitai udah nyiri kunteriktor ngangkut barang bisi subsidi ngagai sitak Bario kena 1 April tu tadi.

“Nya kebuah kitai enda deka bebatak asur enggau kunteriktor ti kih bejalaika pangku pengawa ti pulaika pemaik rayat,” ku iya nengah penerang berita kemari.

Iya mansutka penerang nya laban bisi ripot madahka peranak di sitak Bario agi mayar RM65 lebuh meli gis LPG taja rega udah diberi subsidi RM26.60.

Chong Chieng Jen

Berindik ari ripot nya mega iya udah ngerah bala staf sida bejalaika pansik enggau jampat.

“Enti sema ripot nya amat lalu kunteriktor enda ulih madahka kebuah ti diterima akal, atur terit deka dipejalai nyengkaum ngantung servis sida.

“Di baruh kunterik subsidi pengangkut, kitai mayar kunteriktor ti ngangkut tujuh bansa barang diguna nyengkaum gis LPG ngagai sitak menua ulu,’” ku iya nerang.

Ku iya, ba taun tu sepenyampau RM140 juta diagih ungkup program subsidi perengka pengangkut lalu RM80 juta ari penyampau nya diungkupka Sarawak.

“Kitai mega nunda sistem tinda tebuka ba pengawa nyiri kunteriktor dibida sebedau tu ngena sistem runding lansung.

“Nya kebuah pejalai program tu laun dipejalai, nitihka pematut berengkah ari pun taun tu tadi,” ku iya madah nyemetak.

Suara Sarawak