Anang takut betuchuk vaksin

BINTULU: Mensia mayuh nyengkaum komuniti ba menua pesisir dipinta anang takut betuchuk vaksin Covid-19 ngambi nagang diri ari kena rampit igi penyakit nya.

Residen Bagi Menua Bintulu, Jack Aman Luat madahka Perintah Sarawak kelebih agi Komiti Penyangga Penusah Nengeri Sarawak (JPBNS) udah nyendiaka genap atur bekaul pengawa betuchuk vaksin nya.

Pia mega ku iya, atur renggat keterubah ba palan betuchuk vaksin (PPV) mega udah enggau benung dipejalai nentuka program nya ila lanchar dipejalai.

Pia mega, Jack ti mega Chairman Komiti Penyangga Penusah Bagi Menua Bintulu (JPBBB) ngelalau mensia mayuh ba bagi menua tu patut ngubah runding ngambi enda dibalut runding ti negatif pasal pengawa betuchuk vaksin Covid-19 disadang datai entara 5 ngagai 11 March tu.

Terang iya, mensia mayuh dipinta meri kerejasama ngambi nyeliahka inisiatif tu puntan dijapai lebuh nagang pandemik tu.

Program Betuchuk Vaksin Covid-19 Nasional berambaika jaku, ‘Nyaga Diri, Nyaga Semua’ nya dipejalai ba tiga renggat berengkah kemari.

Bisi 500,000 iku raban gawa ba luan deka betuchuk vaksin Renggat Keterubah, berengkah ari bulan Februari nyentuk April tu.

Suara Sarawak