Anang takut datai meri darah ke Sepital Miri

MIRI: Mensia mayuh anang takut meri darah laban sida diperansang meri darah ngambi nambahka bekal darah di Tabung Darah Sepital Miri.

Tabung Darah Sepital Miri ba sebengkah penerang madahka, mensia mayuh enda ibuh irauka pengelikun enggau pengerai sida lebuh meri darah maya pengerekai igi penyakit Covid-19 tu.

“Tabung Darah Sepital Miri nitihka Atur Pengawa Standard (SOP) ti udah ditetapka Opis Menteri Pengerai Malaysia (KKM) nentuka pengelikun enggau pengerai staf sereta bala pemeri darah meruan dijaga,” ku penerang nya.

Ke rikod, Tabung Darah Sepital Miri ba begunan jauh ari wad tauka palan kuarantin pesakit Covid-19 lalu palan paking entukar khas ungkup sida ke meri darah mega bisi disedia.

Tabung Darah Sepital Miri dibuka ninting Hari Satu ngagai Hari Empat berengkah ari 8 pagi nyentuk 12.15 tengahari (pagi) lalu dibuka pukul 2 ngagai 4.15 lemai (lemai).

Kena Hari Lima, tabung darah nya dibuka berengkah ari pukul 8 naggai 11.15 pagi lalu muak ke lemai dibuka pukul 2.15 ngagai 4.15 lemai.

Taja pia, tabung darah tu nadai dibuka kena Hari Enam, hari Minggu enggau hari besai.

Mensia mayuh enda ibuh ngaga semaya datai meri darah laban staf ba Tabung Darah Sepital Miri seruran ngelaluka penatai sida.

Mensia mayuh mega tau ‘like’ Facebook Page Tabung Darah Sepital Miri ngambi nemu Taga Program Meri Darah Mindah Kin Kitu (Mobile) maya ujung minggu.