Anang tepapa minjau duit ari institusyen ti enda sah

KUCHING: Lalau sentang bejimat ari kena tipu ba media rama enda ngetu disebar ngagai mensia mayuh.

Taja pia, jaku lalau nya sempaka baka ngiri ai ba daun keladi ngujungka sida ti enggai mendingka jaku lalau muntang kena tipu.

Kelimpah ari nipu ngena penyayau bula enggau nuduh orang ke kena tipu ngaga penyalah, siti agi chara orang diatu nipu iya nya ngaga pinjau duit ba media rama.

Kepala Opis Pansik Penyalah Komersial Polis Sarawak, Supt. Mustafa Kamal Gani Abdullah madahka nengah siti penerang media, nipu ngaga pinjau duit ari media rama baka ‘facebook’ udah diripot bisi tiga iti kes di Kuching, Miri enggau Kapit.

“Kes pinjau duit di Kuching ari media rama nuntung siku lelaki bansa China ke beumur 35 taun ti nadai kereja ngujung ke iya rugi RM8,020.

Supt. Mustafa Kamal Gani Abdullah

“Kena 12 April iya gagit ati lebuh tepeda ke iklan pinjau duit ari sebuah serikat ba ‘facebook’.

Udah nya, iya ngaga kangau telefon lalu disaut siku lelaki ti enda dikelala. Iya lalu madah kediri deka ngaga pinjau duit penyampau RM10,000.

Lelaki nya diasuh nganjung gambar tingki ngena ‘whatsapp’ lalu mayar ungkus rejister.

Iya lalu ngaga bayar penyampau RM8,020 bisi lima kali ‘transaksi’ ari 13 April ngagai 17 April ti dikumbai orang ke nipu iya nya kena bayar panjar, bayar pindah duit, bayar SST, chukai enggau ‘duti setem’.

Tang kenyau kelama, iya baru sedarka diri kena tipu lebuh ngasai diri enda nerima duit pinjau taja udah mayuh ngaga bayar ngagai orang ke nipu,” ku Mustafa.

“Ba kes kedua di Miri, nuntung siku lelaki China beumur 37 taun, rugi RM2,000. Kes tu sebaka enggau kes ti ba Kuching lebuh lelaki tu meda iklan ba ‘facebook’ pasal pinjau duit kena ke 12 April tu tadi.

“Lalu iya ninggal ke nama enggau lumur telefon ba ruang ‘komen’ ‘facebook’ orang ke nipu nya madah ke diri deka minjau duit RM25,000.

Lalu kena 15 April iya nerima mesej telefon ari siku orang ti ngumbai diri Alex ngena ‘whatsapp’. Alex tu lalu minta dokumen baka tingki, rikod akaun, salin rikod nggau rikod chukai penatai pemisi iya.

Iya lalu diasuh mayar duit penyampau RM2,000 ngena dua kali ‘transaksi’ nyadi bayar luyar enggau bayar kredit skor pinjau.

Lelaki nya nemu diri kena tipu lebuh nyidi ba sebuah bank endur iya ngaga pinjau tang duit pinjau nya enda masuk,” ku iya.

“Lalu kes ti ketiga nyadi ba Kapit nuntung siku indu Iban, ti beumur 29 taun nadai kereja udah rugi RM1,080. Kenyau ari taun 2018 iya udah meda iklan ba ‘facebook’ sentang duit pinjau tu lalu ninggal ke mesej sereta lumur telefon iya.

Kena ke 12 April tu tadi iya nerima ‘whatsapp’ ari siku orang ke ngumbai diri Mr. Lim ti madah nyadi ejen pinjau duit nya.

Dia indu nya madah deka ngaga pinjau duit penyampau RM10,000 lalu Mr. Lim madah ke dalam timpuh tiga ari duit pinjau nya deka dikemendar.

Tang sebedau nya, indu nya diasuh mayar RM150 kena rejister lalu bayar ke buka deka dipinta bejurut enggau mayuh tuju. Iya lalu mayar penyampau RM1,080 bisi lima kali ‘transaksi’ kenyau ari 16 April ngagai 18 April.

Iya nyedar diri kena tipu udah ti ngasai bebayar ke duit ngagai orang nya tang duit ke dipinjau iya lalu enda diterima,” ku Mustafa.

Piak polis mega ngelalau mensia mayuh ngambika enda mudah tepejuh kena tipu ari iklan pinjau duit ba media rama baka ‘whatsapp’, ‘wechat’, ‘instagram’ enggau ke bukai.

Mensia mayuh dipinta ngaga pinjau duit ari institusyen pekara wang ti sah, koperasi ti direjister tauka serikat peminjau duit ti belesen nyema amai beguna ke duit.

Pia mega mensia mayuh dipinta ngambika anang nyual tauka minjau akaun bank sida ngagai orang enda dikelala laban tu siti ari penyalah ti ulih dituduh ba kort.

“Nyema bisi mensia mayuh deka betanya sentang kes kena tipu tauka lalau sentang kes nipu duit, kita tau meri info ngena ‘whatsapp’ Commercial Crime Investigation Department (CCID) infoline ba 013-211 1222.

Kita mega tau ngelawa portal rasmi Polis Diraja Malaysia (rmp.gov.my), Opis Pansik Penyalah (ccid.rmp.gov.my) enggau Opis Pansik Penyalah Komersial Sarawak,” ku Mustafa.