Angkasawan menua deka bulih anak sapit baru

Angkasawan menua, Datuk Dr Sheikh Muszaphar Shukor deka bulih baru sepasang anak besapit seraya juluk iya ti deka numbuhka ruang bilik ti mayuh nya dijapai.

Bini iya, Datin Dr Halina Mohd Yunos diberita benung ribat tiga bulan.

Berita manah nya dikunsika Dr Sheikh Muszaphar empu nengah akaun instagram iya enggau gambar sida sebilik.

“Alhamdulilah. Terima kasih Tuhan. Dr Halina diatu benung ribat 14 minggu anak sapit.

“Aku chukup gaga, enda ulih bejaku. Pekara tu baka ke nyadi baru ngagai aku (Dejavu),” ku iya.

Taja pia, iya sedarka ribatka anak sapit bisi pemar bepelasarka peneleba ke diasaika bini iya lebuh ribatka Sheikh Adam enggau Sheikh Noah.

“Kami seruran deka bisi ruang bilik ke besai. Tang ribatka anak sapit tu ngembuan pemar ti chukup besai baka ke udah diasaika kami sebedau tu.

“Suah engkual, mutah, kembung, nyera belama. Bedarah belama baka ke udah diasaika bini ngelama tu,” ku posting iya.

Ku iya nambah, Dr Halina agi bejalaika tanggungpengawa iya ti nyadi orang gawa ba luan ngubat sida ke kena rampit koronavirus (Covid-19).

“Tusah ati beratika Dr Halina nengah trimester keterubah lalu agi gawa nyadi orang gawa ba luan ngubat pesakit Covid-19.

“Siti ari pekara ti ulih digaga aku begulai enggau iya diatu iya nya nambah pemerat tubuh ti mega sebagi ari semaya kami duai,” ku iya.

Seduai nirika rumah tangga kena 10 Oktober 2010 lalu bisi empat anak iya nya Sophea Isabella, Sophea Natasha, Sheikh Adam enggau Sheikh Noah.