KUCHING: Juluk ati Anita Assan dekaka pengelandik diajar indai iya ulih ditampung ngagai rebak biak.

Peranak asal Penasu Igan, Sibu nya madahka diri belajarka ngaga produk kraf ari pengelandik jari, nusuk manik tangu kenyau ari iya berangkat dara suba.

Anita, 43 taun, nampung penemu enggau pengelandik nusuk manik endang ari ajar indai iya empu, Medilin Anak Bain.

“Terubah suba, aku belajarka pengelandik ngaga tangu nya semina ngagaka dikena diri sebilik aja lalu apin bisi runding deka bejual.

“Lebuh belajar agi dara suba, bendar meransang diri empu laban ke endang minat belajarka pengelandik jari kitai Iban tu.

“Pedis enggau nyamai lebuh belajar nya endang diasaika aku, terubah ngaga tangu nya pedis amat sepi aku laban bedau nangkap iga baka ni chara tauka rurun ngaga tangu.

“Tang bai ati keran, bendar mansal diri laban deka nitihka singkang sida ke udah landik ngaga tangu tu.

“Sebedau ngaga tangu tu, aku merati sereta belajar ari indai aku empu maya lepa.

“Lebuh ke merati, bisi ga nyaup tudah indai tang pemuas ke nyaup nyau minat ga lalu aku belajar ngepun kediri.

“Rindu meda keranjai jari indai pengudah tangu nya tembu, nyau labuh pengerindu ga aku.

“Nadai ga lama belajar ari indai, bisi ga dua ngagai tiga hari laban ke minat sereta rindu meda asil tangu ke udah tembu,” ku iya ngepunka randau enggau Suara Sarawak.

BUNGAI ARI FACEBOOK

Anita madahka iya nadai kala ngulu sebarang kus belajar ngaga tangu tauka sebarang program bekaul produk pengelandik jari sebedau tu.

Tang, iya madahka diri semina belajar enggau meratika bungai tangu ke udah tembu digaga orang sebelah media rama baka Facebook.

Peranak asal Melanau enggau Iban madah, media rama baka Facebook ngembuan besai reti ba iya laban ari nya meh iya belabuh belajar nunda bungai tangu kelimpah belajar ari indai iya empu.

Anita madahka iya naka ulih nitihka singkang bala bukai bekenaka teknologi digital ke udah ngenataika mayuh penguntung kelebih agi pedagang kraf.

“Ba aku, media rama tu chukup besai guna kelebih agi maya pandemik tu nentuka kami ulih ngiga anak belanja taja diau ba rumah aja.

“Tebal agi, aku nerima udar endang ari media rama lalu bisi mega ari bakih penguna ke udah meli ari aku sebedau tu.

“Naka diatu, aku semina ngaga tangu pengudah nerima udar ari bala bukai baka bakih anak aku.

“Kadang, anak aku pen bisi nyaup ngaga tangu lalu nya sebagi ari chara aku ngajar iya ngambi landik betusukka leka manik baka ngaga tangu tu.

“Kelimpah ari tangu, aku mega bisi ngaga produk bukai baka selampai manik, selampai sulam, baju burung sulam, marik enggau buah kabo.

“Puji Tuhan, dagang aku nerima mayuh peminta lalu ninting bulan bisi belama nerima udar ari bala penguna.

“Bisi amat dikena nambahka anak belanja kami sebilik sereta dikena aku bebelika leka manik baru,” ku Anita nerang.

ATI MESTI LIAT

Sekumbang ba dunya dagang kraf tu, Anita madahka iya kala ngasaika mayuh penguji enggau pemar.

Ku Anita, entara pemar ditapi nya lebuh nengkebang bungai ke dipinta bala penguna.

Kebuah pia laban bala penguna deka ngasuh iya ngaga tangu nitihka bungai ke dipinta sida.

“Lebuh sida ngudar, kadang gambar ke dianjung nya enda terang. Pedis amat aku deka beratika gaya bungai tangu nya.

“Bendar meh tudah aku nunda gambar ti dikedeka bala penguna laban sida udah pechaya sereta ngandalka aku ngaga tangu dikerindu,” terang iya baru.

Pemanah tangu bungai terung udah mai tuah ngagai Anita Assan bulih lumur dua ba Pekit Tangu Online 2021 ke udah diatur empai lama.

Ku Anita, pengudah bulih lumur dua, udar iya diatu nyau bisi nambah mimit ari ke udah.

Ngelansa pasal tangu ke dianjung iya bepekit empai lama, Anita madahka ukir nya kebendar dipegulai enggau dua bungai.

“Chura ba atas nya diambi ari siti bungai tang aku enda nemu nama bungai nya lalu ke di baruh nya bungai terung.

“Tangu ke ngembuan dua bungai nya kebendar dipinta siku penguna benama Chlorina.

“Nyau ke lama udah ngaga tangu tu, nadai ga beleman tang terubah belajar suba aja ke pedis amat.

“Aku ngaga tangu ke dipegulai dua bungai nya digaga pengelama dua minggu aja.

“Aku nadai belajarka pengawa ngaga tangu baka nya laban semina dipegai enggau dua bungai aja,” terang iya.

Ku Anita, semina bungai terung ke di baruh nya ditengkebang iya empu lalu disaup anak iya.

Berebak enggau nya, Anita madahka dalam sebulan iya nerima empat ngagai enam udar.

Ku iya, untung diterima iya bepanggai ngagai peminta enggau udar ari bala penguna.

“Kadang, enti nerima mayuh udar, bisi ga untung datai RM1,000 lebih, umbas dikena aku mulaika baru puku sereta meli leka manik enggau kereban diguna baru.

“Pandemik Covid-19 tu udah meri pemar ngagai aku lebuh deka meli bahan dikena ngaga produk baka leka manik enggau ubung.

“Maya kedai ditutup, ka pen enda enchadika kedai online meh endur aku meli leka manik enggau ubung taja pen kadang chaj nganjung nyau ngelui ari rega barang diudar nya.

“Ka pen enda, beli aja laban deka nangkup peminta bala penguna ngambi sida enda lama nganti.

“Taja pia, naka diatu bala penguna ke ngudar ari aku endang sabar belama laban nemu penusah ke nyadi ketegal pandemik Covid-19.

“Aku mega naka ulih nangkup peminta ngambi sida enda lebu lalu datai baru meli tauka ngudar produk ari aku,” terang iya.

KREATIF

Nampung baru randau, Anita madahka orang keterubah meli tangu iya nya orang sepiak rumah sida.

Terang iya, orang sepiak rumah sida rindu meda pemanah enggau pengalus gambar bungai tangu dipeda iya lalu begigaka orang ke nemu ngaga tangu.

“Selabuh maya nya, indai iya empu kala meda kami duai indai ngaga selampai manik.

“Meda baka nya, iya pen nguji ngudar siti tangu ari aku lalu pengudah tangu nya tembu, dia iya tepantup ati meda pemanah tangu digaga aku.

“Udah nya, iya ke rinduka pemanah tangu digaga aku lalu mai bala iya ngudar baru tangu ba aku.

“Bepun ari nya, aku berengkah ngambi udar ari sida ke besemak dia dulu sebedau mantaika produk tangu nya sebelah media rama,” ku Anita nerang baru.

Pengudah mantaika tangu ke udah tembu nya sebelah media rama baka Facebook, dia produk Anita majak laku enggau dikerindu bala penguna.

Anita madah, menua pemadu jauh kala meli produk iya nya Johor, Bintulu enggau Kuching.

Ku iya, nya entara menua ke kala meli produk ari iya lalu ngelama tu, utai ke dikerandau iya enggau bala penguna nya bekaul bungai tangu enggau chura iya.

Anita mega madahka iya naka ulih berandau sereta nanya bungai tangu dikedeka bala penguna nentuka sida tepantup ati lalu enda lebu meli produk ari iya.

BEDUA PENEMU

Nampung randau ke dalam agi, Anita madahka media rama baka Facebook, Instagram enggau pelasar bukai nya ngembuan mayuh pengelebih.

Ku iya, entara pengelebih media rama tu baka semua orang ulih meda sereta bekunsika utai ke dibantaika aku ba Facebook.

Pia mega ku iya, bala penguna mega ulih nanya terus nyema tekait ati enggau produk tangu sereta produk bukai digaga aku nya.

Ari Facebook tu tadi, iya enda bepanggai enggau chara promosyen betunga mua baka ke suah dikereja kitai suba sebedau bisi media rama baka ke diatu.

Terang iya, chukup muntang sida ke mega pedagang kraf ngelakuka produk diri laban iya ngasaika semua kitai bisi Facebook enggau telefon chulik nadai ngira biak tauka tuai.

Anita mega ngarapka dagang produk kraf iya tu beretan enggau pemisi media rama.

“Aku mega bisi masuk sekeda group sebelah Facebook baka Facebook Group Berkongsi Hasil Manik.

“Ba dia, ukai semina indu aja tang sida lelaki bela ampit mantaika produk kraf diri.

“Chukup rindu ulih berandau enggau pedagang kraf bukai lalu sama mantaika produk diri.

“Ba aku, pemanah masuk group nya tadi laban kami ulih bekunsika produk kraf lalu nyaup pangan diri begigaka bungai enggau chura dipinta.

“Kelimpah bedua penemu, sida mega bisi nyual bemacham barang baka leka manik, ubung enggau ke bukai ngambi kami nemu sereta meli barang dikena ngaga produk baka tangu, selampai enggau ke bukai tu.

“Kadang nya sida dia enda rangka penemu bekunsi sereta ngajar chara baru ngaga tangu,” ku Anita tuchum seraya madahka diri chukup rindu bekunsika penemu lalu bulih penemu baru ari Facebook Group nya.

KEREMBAIKA PRODUK ASAL

Nya alai, Anita ngarapka pengawa ngaga produk kraf baka tangu tu ulih ditampung rebak biak dudi hari.

Ku iya, pengelandik asal kitai baka begagaka tangu tu patut ditampung rebak biak ngambi enda lesap diserunyut arus pemansang dunya.

Anita mega madah, rebak biak patut ngerebut peluang belajar enggau ngansah pengelandik diri laban diatu pengelandik tu tau nyadika dagang.

Ambika banding ku iya, enggau pengelebih media rama, mensia mayuh ba serata dunya ulih meda kreativiti, pemanah sereta pengelandik jari sida.

“Jaku peransang aku nuju pedagang kraf bukai, sama meh kitai ngemansangka pengawa kraf tu lalu ngerandang ekonomi digital nitihka singkang dunya.

“Pengawa kami ngelakuka produk kraf tu mega patut ditampung rebak dudi nentuka produk asal kitai majak dikelala lalu dikerindu mensia mayuh datai ba tikas entarabansa,” ku pesan Anita sebedau nyimpul randau enggau Suara Sarawak.