Anjung ukui betuchuk vaksin

SPAOH: Operasyen Rabies Renggat Kelima ba menua tu deka diatur berengkah ari 31 Julai ngagai 3 Ogos ba tiga bagi menua; Betong, Sri Aman enggau Engkilili.

Nya alai, mensia mayuh dipinta nganjung ukui sida betuchuk vaksin nyerumba operasyen diatur nadai bebayar nya.

Sapit Kepala Menteri Datuk Amar Douglas Uggah Embas minta peranak ba kandang menua ngelingi beratika pekara tu enggau manah.

Ku Uggah, igi penyakit Rabies tauka dikumbai ukui gila tu sebansa penyakit ti tau ngasuh bebadi nyawa enti sema diketup ukui lalu enda diubat tumu.

“Naka diatu, bisi 18 dituku bebadi nyawa ketegal diketup ukui ti positif Rabies kenyau ari igi penyakit tu ditemu ngerekai 2017 suba.

Douglas Uggah Embas

“Nya alai, Opis Servis Veterinar Sarawak (JPVS) begulai enggau ejensi bukai chakah ngatur pejalai ngabas seraya nyendiaka servis betuchuk vaksin nadai bebayar enggau tuju ngemunas igi penyakit tu ba tiga Pelilih ti dirintai,” ku Uggah.

Iya ti nyadi Chairman Pemutar Penusah Ngenyit Nengeri mansutka jaku nya pengudah bejalai ngabas seraya gawa ngagai Rumah Henry Ilon di Senunok Paku, ditu kemari.

Pia mega ku Uggah, mensia mayuh dikearap ngerebut peluang tu nganjung ukui sida betuchuk vaksin.

“Ukui tu enda parai pengudah dituchuk vaksin.

“Mensia mayuh mega dipinta beratika pekara tu enggau berat laban minggu nyin kemari bisi dua ukui ditemu positif rabies ba Rumah Samueh Adeng di Engkilili,” ku iya madah nyemetak.

Suara Sarawak