PENANYI sigat datai ari Ulu Kanowit, Anthony Usan mujur ngeluarka lagu pemadu baru ti diberi nama Tepambar.

Lagu nya berengkah dikeluarka ba channel YouTube T&S Recording Studio kena 1 March tu tadi.

Naka diatu, lagu nya mujur dipeda lebih 79,000 orang sereta nerima tanda like lebih 1,600 ari mensia mayuh.

DIKEENGGAI KETEGAL MERINSA
Anak tuai ari dua iku diri menyadi nya madah, cherita dalam lagu nya nadai besangkut-paut tauka mangka pengidup iya.

Anthony madah, iya naka ulih belematika jalai cherita dalam lagu nya ngambi ulih nyadaka lagu nya enggau manah sereta negu ati bala peninga.

“Lagu tu nyeritaka pengerindu dua iku sulu ti nadai pengujung manis ketegal apai indai indu kelalu milih menantu lalu nagang seduai begulai.

“Sulai meh pengerindu ngelama tu ti suah ditimang ninting hari. Punas meh pengandal ati deka jadi idup sekunsi nyentuk lesi baka orang bukai.

“Kempang amat menyati pengerindu tuchi ti udah ditanggam dua ati saum sekunsi. Pengerindu lela ketegal sida angkunka pengeraja tampak nama tebilang rita.

“Nama daya tua asi? Tua ditagang begulai ketegal aku datai ari ruang bilik merinsa, nadai reta, nadai pengeraja,” ku iya seraya ngeluluka cherita dalam lagu nya.

Iya madah, ketegal pengerindu ditagang, dia deh dua iku sulu nya milih jalai beserara lalu laki nya nyurut kediri.

Indu nya nadai daya mantah jaku apai indai diri laban iya anak asi sereta dikeandal sida. Taja pen pedis nerima semua nya tang seduai bela nyurutka diri.

Tepambar meh pengasai pengerindu lelaki nya laban kelalu asa enda ulih begulai enggau sulu ati ti pemadu dikesayau enggau diasi iya.

PENGERINDU BELAGU
Ku tusui Anthony, pengerindu ba pengawa belagu nya endang dikembuan iya ari mit nyentuk diatu.

Ninting hari pengerindu ba pengawa nya majak ngerembai ngujung ke iya mujur begelar siku penanyi tebilang Dayak.

Ketegal ngembuan pengelandik enggau pengerindu ti besai ba pengawa belagu, dia deh iya suah dikangau orang belagu rambau bisi pengerami tauka program bukai.

Ukai naka nya aja, iya mega suah enggau orang ngeruh ai masuk pekit belagu.

“Pengawa belagu tu udah nyadi sebagi ari pengidup aku. Nya alai, aku suah ngaul diri ba pekit tauka pengawa belagu,” ku iya.

Sekeda pekit belagu kala dipasuk iya baka Pekit Belagu Program Kampung Ujan Borneo ti ngarika Universiti Putra Malaysia Kampus Bintulu (UPMKB).

Program nya diatur beserimbai Pengerami Kampung Ujan Borneo Poliku 2018 ba Politeknik Kuching kena 17 nyentuk 19 Ogos 2018

Udah nya, iya masuk Pekit Sarikei Idol 2018 ti diatur Opis Tanah enggau Survei Bagi Menua Sarikei kena 30 September 2018 sereta mujur bulih penuduk lumur tiga.

Anthony bulih penuduk lumur dua ba Pekit Belagu ti diatur Radio Televisyen Malaysia (RTM) beserimbai Program Servis Komuniti Mindah Kin Kitu ba Balai Mayuh Guna Sungai Plan, Bintulu kena 24 nyentuk 25 Ogos 2019.

Kelimpah ari nya, iya kala ngeruh ai nyadi penyereta Program Nguji Penau Bintang RTM 2020 ba Mydin Petrajaya, Kuching kena 22 nyentuk 23 Februari 2020 enggau mayuh agi pekit bukai.

PEJALAI MERINDANG
Lebuh dirandau senentang pejalai diri ba industri muzik Dayak, pegawai Kaunsil Pekara Makit Besai Pengawa Betanam Betupi (Fama) nya madah, semua nya bepun ari peransang sida sebilik enggau bala bakih.

“Sida nemu pengerindu aku ba pengawa belagu sereta muji pengelandik enggau pemanah sada nyawa dikembuan aku.

“Nya alai, sida meransang aku nyingkang jauh agi ba pengawa tu nengah pengawa ngerikod enggau ngeluarka lagu diri empu.

“Sida mega meransang aku ngeluarka lagu ti ditengkebang aku empu. Bepun ari tu meh aku majak ransing deka ngeluarka lagu diri.

“Lagu keterubah dirikod enggau dikeluarka aku iya nya lagu Badu Bekunsi Pengerindu. Keterubah suba, aku agi bedau chukup ngembuan pengandal ati ngagai diri empu tang nyau kelama udah nya, aku pen berani matak singkang diri.

“Pengerindu Tua, tu lagu kedua ari aku ti ditengkebang Glan Unang lalu dikeluarka aku ba baruh perabung T&S Recording Studio.

“Lagu tu mujur nerima timbal manah ari mensia mayuh kelebih agi bala peminat aku,” ku tusui iya.

Pekara ti balat ngasuh penanyi beumur 29 taun nya ransing ngerikod enggau ngeluarka lagu iya nya lebuh ditanya T&S Recording Studio nyadi penanyi ba baruh perabung sida.

“Tu siti basa ti pemadu besai ba aku lebuh sida meri pengandal ati ngagai aku nyadaka lagu Tepambar.

“Ba aku, tu meh peluang berega dikena ngansah penau enggau ngemansangka diri ba pengawa merindang nitih singkang bala artis Iban ti bukai.

Ungkup rikod, Anthony mujur ngeluarka lagu Badu Bekunsi Pengerindu, Pengerindu Tua enggau pemadu baru iya nya Tepambar.

PAIT MANIS MERINDANG
Nadai pengawa muntang dikereja lalu pia mega nadai utai enda ulih dikereja enti kitai liat ati sereta pintar ngiga jalai ngatur pengawa diri.

Lebuh bejalaika pengawa, bemacham penguji datai nuntung. Nya endang udah adat lebuh idup ba dunya injau tu.

Baka nya mega pejalai Anthony ba pengawa merindang, iya enda tinggal napi bemacham penguji tang nya enda ngeruntuhka pengarap enggau pengerindu diri ba pengawa nya.

Bujang Kanowit nya madah, penguji besai ditapi iya sekumbang mekuhka pengawa merindang baka suntuk awak enggau puku dikena ngeluarka lagu.

Terang iya, laban ti ngembuan batang pengawa tetap, nya alai, kekadang lebuh deka ngeluarka lagu, iya napi penanggul suntuk awak ngereja pengawa nya.

Pia mega, ku iya, lebuh bisi awak dikena ngeluarka lagu diri, iya napi penanggul suntuk puku dikena ngemujur pengawa nya.

“Pekara bekaul awak enggau puku tu meh nyadi penanggul besai ditapi aku lebuh bejalaika pengawa ngeluarka lagu.

“Taja pia, penanggul tu enda ngeruntuhka pengerindu aku ba pengawa tu. Aku naka ulih ngiga jalai dikena nyeliah semua penanggul tu.

“Peransang aku, anang mantul ngapa lebuh napi bemacham penguji tang liat ati laban nadai utai enda ulih dikereja enti kitai ransing ngereja pengawa tu,” ku Anthony.

TIMBAL MANAH
Naka diatu, timbal ari mensia mayuh kelebih agi bala peminat penanyi ti ngembuan sada nyawa ti chukup lunak didinga nya chukup manah sereta ngemantup ke ati.

Anthony madah, sebedau tu, iya nadai kala nagit nama-nama ba lagu diri laban nya semina dikena ngematupka ati aja ketegal angkun ke pengawa belagu.

“Aku beterima kasih laban lagu aku nerima timbal manah ari bala peminat. Sida madahka diri rindu sereta meri penemu manah maya mendingka lagu aku.

“Pekara tu meh ngasuh aku majak ransing deka ngeluarka mayuh agi lagu bukai dudi hari dikena masa bala peminat diri.

“Kelimpah ari nya, aku deka ransing agi belajar senentang vokal enggau chara ngenataika lagu ngambi ulih ngeluarka lagi ti bekualiti,” ku iya.

TIBAR PERANSANG
Dikena ngujung ke randau diri, penanyi ti nyadaka lagu Tepambar nya ngelalau mensia mayuh ngambi seruran nyukung industri muzik Dayak.

Ku iya, begempung meh kitai nyukung bala penanyi Dayak sekali ke udah lama tauka agi baru mekuhka pengawa merindang ngambi industri muzik Dayak majak maju lalu dikelala diserata dunya.

Iya mega madah, genap iku kitai bisi ngembuan pengelebih kediri empu. Nya alai, anang telunga-lunga meda orang aja tang rebut meh peluang ti bisi dikena ngemansangka pengidup diri ngambi bela nyulut baka orang bukai.

“Lebuh kitai udah nyulut, anang sesekali kitai baka kachang enda ingat ke kulit diri.

“Penyulut dikembuan kitai sehari tu ukai semina bepun ari kitai empu aja tang tu berebak ari sukung enggau sampi semua orang.

“Baka nya mega, pemujur aku ba pengawa merindang tu endang ari sukung enggau sampi bala peminat, bakih, bakih sama artis enggau kami sebilik empu.

“Nya alai, ngena peluang ti berega tu, aku meri besai terima kasih ngagai kita semua ti enda leju nyukung enggau besampika pemujur aku.

“Aku ngarap Tuhan merekatka kita semua lalu terus meh nyukung aku ba pengawa merindang,” ku Anthony.