KANOWIT: ‘Laban endang kala nyadi pengajar, aku deka ngemeratka isu senentang pelajar lalu deka mai rayat Ngemah terus mansang ke mua ari ke udah,ku Anyi Jana.
Chalun Gempung Parti Sarawak (GPS) Ngemah nya mega meri terima kasih ngagai Parti Rakyat Sarawak (PRS) laban udah nyirika iya nyadi chalun ngarika parti nya.
Sebedau tu, sitak Ngemah diarika Alexander Vincent pengelama dua pengggal nyadi pengari sepengudah menang ba PRN Ke-10 enggau Ke-11.
Anyi kala gawa nyadi Sapit Pegawai Opis Pelajar Bagi Menua Kapit dipilih nganti Alexander Vincent ba Pengawa Bepilih Besai Nengeri (PRN) Ke-12.
Iya endang peranak asal Ngemah lalu berengkah nyadi pengajar dalam taun 1988 ba Sekula Primari (SK) Nanga Kain Kapit.
Ngembuan tikas pelajar Master Degree Education ari Open University Malaysia (OUM) lalu bisi tiga iku anak.
Ku iya, kebuah deka masuk ba bidang politik laban deka ngemanahka agi infrastruktur di Ngemah sereta deka ngangkatka tikas sosial-ekonomi rayat ditu kelimpah ari pekara pelajar.
Ba pengawa PRN tu, Anyi deka besatup enggau empat iku chalun iya nya Dr. Joseph Jawa anak Kendawang ari Parti Sarawak Bersatu (PSB), Satu Anchom (PKR), Leo Bunsu (PBDSB) enggau Charlie Genam (PBK).
Ungkup penemu, bisi 9,853 iku pengundi ti udah berejister ba Komiti Besai Pengawa Bepilih (SPR) ba sitak Dun Ngemah.
