Apai indai anang enda ransing nyengulaka anak

LUBOK ANTU: Kaban Parlimen Lubok Antu ngansak apai indai terus ransing nyengulaka anak sida.

Tu ku iya bepun ari ari semina pemujur pelajar aja ulih ngubah tikas pengidup rayat di menua pesisir.

“Aku mega begunaka kerejasama ari semua dikena kitai besaup ngemansangka pelajar sereta ngemanahka agi perengka guna ngambika nembiak lantang agi belajar.

“Enti kitai meda maya hari tu tikas pengidup majak besai alai anak sida ke bisi agi duit nya mujur agi belajar laban sida ulih besekula ba sekula ke mar kelimpah nadai penanggul mayar tuisyen.

“Tang tu bebida enggau kitai ari ruang bilik ti enda tentu penatai pemisi ti semina ngandalka sekula perintah aja,” pia ku iya madah maya Pengerami Merarau Begulai enggau ketuai sereta ‘Jasamu Dikenang’ 2019 di SK Batang Ai, kemari.

Jugah madah, sekula di menua pesisir mega meseti bisi sistem pelajar ke manah sereta ukai ba sekula ke dipilih aja.

Ku iya, tu dikena nentuka sistem pelajar nya manah enda ngira kaya tauka seranta.

“Sukung ari semua nya nyadika pelasar pemujur pelajar anak kitai dudi hari alai ari tu kitai deka ngasilka mayuh agi raban profesional enggau intelektual,” ku iya madah baru.

Juga mega madah, Gerempung Apai Indai enggau Pengajar (PIBG) siti gerempung ti engkeman lalu besai reti ngagai pemansang pelajar di sekula.

“Nya alai, dikena bejadika pengandal enggau juluk ati pelajar siti mekanisme ke ulih diaduka kitai iya nya nyintalka agi kaul sekula enggau apai indai nengah PIBG.

“Tanggungpengawa apai indai kelimpah komuniti ke bukai meseti bisi sereta tegut,” ku iya madah.

Pengerami sehari nya digulu lebih 500 iku mensia mayuh nyengkaum bala tuai raban bansa enggau apai indai nembiak sekula.

Maya tu mega Jugah bisi nyuaka pemeri iya nya RM200,000 ngagai SK Batang Ai dikena ngaduka perengka guna sekula nya.

Kelimpah ari nya, Kaunsil Kepala Pengajar Lubok Antu bela nerima pemeri ari iya RM5,000.

Suara Sarawak