SARATOK: Apai indai diperansang nyadi ‘pengajar’ bala anak sida lebuh ba rumah.

Sapit Menteri Pengeluar Kuasa enggau Pengeraja Asal, Datuk Ali Biju madahka nya siti ari juluk ati iya ti deka meda pelajar ukai semina naka ba sekula aja.

Ku iya, pengawa belajar patut ditampung enggau dikemeran ba rumah lalu juluk nya ulih dijapai kitai enti bisi sukung ari apai indai sida.

“Besai bendar pengandal aku deka meda pelajar ukai semina ba sekula aja tang bisi ba rumah, ke alai pengawa ngajar dilempai ngagai apai indai nembiak.

“Udah nyata dipeda, pemujur ba dunya pelajar begunaka kerejasama semua raban lalu orang ti menggi pangku pengawa besai ngepunka semua tu endang apai indai.

“Nya alai aku ngarapka apai indai bisi penyiru enggau ibuhka pelajar bala anak sida laban pelajar tu siti pekara chukup beguna dikena ngemansangka modal mensia menyana.

“Tu mega ulih nyamin pengelantang idup sida kelimpah nyaup ba pemansang menua jemah,” ku iya madah nyemetak.

Ali nibarka jaku peransang nya lebuh dipebasa bejadika Pengawa Nutup Karnival Buding Renggat Nengeri Sarawak 2022 ba Dewan Sri Krian ditu, pagi tadi.

Iya madah baru, pengawa belajar patut seruran ditarak nadai ngira endur dikena matih nembiak angkunka pelajar lalu meretika pemesai guna pengawa nya.

Ngena peluang nya, Ali ngemendarka agih belanja RM20,000 ngagai Kontinjen Sarawak nyadika peransang ngagai sida bepekit ba renggat nasional diatur ba Melaka kena 21 nyentuk 23 Oktober 2022.