Apai indai nyadi peransang Fazlynna nyulut ba pelajar

KUCHING: Singkang keterubah dikearap ngerandang jalai nempa mayuh agi pemujur dudi hari, ku juluk ati Fazlynna Elty.

Jaku nya dikunsi Fazlynna ba ruai Facebook iya seraya madahka pemujur nya mega nyadi peransang ngagai bala bukai ngambi ransing ngiga penemu.

“Pemujur ditempa aku sehari tu berekat ari sukung enggau jaku peransang kami sebilik kelebih agi apai enggau indai.

“Tu ukai aku kediri aja, tang semua tu beduduk ari pengandal orang ti begulai enggau aku ngelama tu, sida pechayaka juluk ati aku,” ku iya ba penerang nya.

Fazlynna nerima Anugerah ‘The Civil Engineering Management Prize’ ari University of Manchester, United Kingdom.

Iya nerima anugerah nya laban pemujur nembuka projek kediri ungkup renggat 2019/2020 diberi nama Design for Safety (DfS) in Construction in Developing Country: A Study of Awareness, Education and Practice among Designers in Malaysia.

Ungkup penerang semua, projek ditengkebang Fazlynna ngena data semasa (database) lalu disadang ulih dipansut enda lama agi udah matak perati dunya.

Enggau peluang tu, Suara Sarawak enggau tim Ruai meri tabi puji enggau pengaga ati ngagai Fazlynna laban mujur bulih anugerah betikas entarabansa tu.

Pemujur Fazlynna nya mega dikearap ulih nyadi peransang ngagai bala nembiak bukai ngambi ransing ati sereta bebendar agi ngulihka juluk ati sida.

TIANG SUKUNG… Fazlynna begambar kenang enggau apai indai sereta menyadi iya.

 

TANDA BASA… Anugerah diterima Fazlynna.

Suara Sarawak