ARTIKEL

Apai indai peransang nyadi artis

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

PENANYI sigat asal ari Sri Aman, Avester Joe tauka Avester Joe Musin mujur ngerikod enggau ngeluarka lagu pemadu baru diri ti diberi nama Telih Dalam Ati.

Lagu nya mujur dikeluarka nengah pelasar YouTube TJKSB Music Production kena 13 Mei tauka Hari Enam tu tadi.

Kebendar, lagu Telih Dalam Ati nya tampung ari lagu kedua iya, Ditagang Jadi lalu jalai cherita dalam lagu nya nadai besangkut paut enggau pengidup iya.

PENGERINDU PUNTAN
Ungkup penerang, lagu Ditagang Jadi nya mujur dikeluarka ba bulan Februari tu tadi ba baruh pelasar YouTube TJKSB Music Production.

Lagu nya bekenang ke pengerindu dua iku sulu puntan ba tengah jalai ketegal ditagang apai indai indu nya.

Sida enggai ngambi lelaki nya nyadi menantu laban lelaki nya datai ari ruang bilik merinsa nadai pengeraja enggau reta tengkira.

LANDIK…Avester Joe siku penanyi Iban ti landik belagu enggau ngembuan sada ti manis didinga.

Lalu lagu Telih Dalam Ati nya nyeritaka pengasai ati lelaki nya ti balat asa sereta nadai daya laban puntan jadi enggau sulu ati ti balat dikesayau iya.

“Betaun tua nanggam pengerindu ti disempulang danji tali semaya deka idup sekunsi nirika ruang bilik baka orang bukai.

“Tang sayau seribu sayau, semua tu anchur bekechai dalam sekelip mata aja.

“Nadai aku ngadang sida kempang menyati pengerindu tua tuchi, sunyi meh aku tinggal kediri nadai nuan ambai asi.

“Petang pengidup aku nadai nuan agi ba tisi, lelengau aku ngenang pengingat tua suba asi, sinu aku ngenang nasip tua bangat ditagang jadi baka tu.

“Nama daya aku deka nyapai nuan intan? Nuan disema baka bulan pegari ba langit mingkai lalu tudah aku baka pungguk nyabakka bulan ngenang nasip diri,” ku iya seraya ngelulu cherita dalam lagu nya.

Tusui Avester Joe, keterubah ninga lagu Ketegal Apai Indai enggau Nesal Lenyau Nuan ti disadaka penanyi Terent Tomaz, iya pen tekait ati.

Lagu nya ditengkebang siku komposer bepenau ba baruh TJKSB Music Production, Michael Tony.

Nya alai ku Avester Joe, iya meri pengandal ati ngagai Michael Tony nembu ke lagu Ditagang Jadi ti ditengkebang niang James Jacob.

“Bepun ari tu meh, aku lalu bekerejasama enggau iya nembu ke lagu Telih Dalam Ati ti nyadi tampung ngagai lagu Ditagang Jadi,” ku iya.

PERANSANG APAI INDAI
Anak kedua ari tiga iku diri menyadi nya madah, pengerindu iya ba pengawa belagu nya endang dikembuan iya ari mit.

Iya madah, lebuh agi mit suba, iya rindu amat ba pengawa belagu lalu pengerindu nya dikembuan iya nyentuk diatu.

TERUS NYUKUNG…Avester Joe meransang mensia mayuh ngambi majak nyukung industri muzik Dayak.

“Meda aku balat angkun pengawa tu, dia deh apai enggau indai seruran meransang aku masuk pekit belagu.

“Seduai andal aku ulih pegari nyadi siku artis lalu tu meh nyadi ke pun peransang aku ransing masuk mayuh pekit belagu sereta kala bulih gelar champion.

“Aku temegah laban juluk seduai mujur dikeamat lebuh aku mujur ngeluarka lagu diri ba baruh perabung TJKSB Music Production,” ku Avester Joe.

Sebedau tepejuh ba dunya pemerindang, iya ransing amat masuk mayuh pekit belagu lalu ari nya meh iya belajar ngalunka sada, chara belagu, nguasa panggau enggau ti bukai.

PEJALAI MERINDANG
Pejalai Avester Joe ba dunya pemerindang Dayak nya endang dirandang siku penanyi Iban tebilang, niang James Jacob Selat ba taun 2015.

Ku iya, maya nya suba, iya suah nyempulang James Jacob merindang ba mayuh palan pemerindang ba selampur menua.

Nya nyengkaum ba sebelah rumah asap, pub, palan karaoke, bistro enggau mayuh agi ti bukai nyentuk ngagai menua Semenanjung.

“Iya meh orang ti ngerandang jalai ngagai aku ba dunya pemerindang tu lalu ngangkatka aku nyadi siku artis Dayak.

“Nya alai, aku chukup beterima kasih ngagai iya laban udah mantu aku ngamat juluk diri deka nyadi siku penanyi.

“Pengudah iya midang sulai, aku berasai sunyi laban lenyau siku bakih ti chukup manah enggau begulai.

“Aku besampi ke semengat iya diau lantang ba menua Serega,” ku Avester Joe seraya mantaika penyinu ati diri.

Ungkup penerang, penanyi beumur 28 taun nya mujur ngerikod enggau ngeluarka tiga lagu diri nyengkaum lagu Nikal Pulai, Ditagang Jadi lalu pemadu baru iya nya Telih Dalam Ati.

Ukai naka nya aja, diatu iya benung kiruh ngerikod enggau ngeluar lagu keempat ti deka dikeluarka enda lama agi.

Nangkan nya Avester Joe madah, siti agi lagu baru iya ti benung digaga iya nya lagu Beserara Ketegal Urang Ketiga ti ditengkebang Valentino Paul.

“Nya alai, aku ngarap bala peminat liat ati nganti lagu baru ari aku. Nya dikena aku masa bala peminat laban enda kala leju nyukung pengawa aku merindang,” ku iya.

ASAM GARAM MERINDANG
Seagi-agi kitai mensia idup ba dunya tu, kitai sigi enda kala pungkang napi bemacham penguji ti seruran datai sebarang maya.

Avester Joe madah, mayuh orang ngumbai pengawa nyadi penanyi nya semina ngerikod enggau ngeluar lagu sereta merindang kin kia ba mayuh palan pemerindang.

“Lebuh kitai begelar siku artis, dia deh kitai deka majak dikelala mensia mayuh sereta ngembuan peminat kediri empu.

“Sida deka betati ke pengidup kitai, nya alai, beguna amat kitai nyaga pengidup diri laban mimit kitai ilap, dia deh kitai deka nerima mayuh macham jaku pejah ti tau ngelabuhka kitai.

“Ba dunya pemerindang, jaku pejah enggau petenah tu endang pekara ti suah nyadi, taja pia, kitai patut pintar mutar pekara tu lalu anang terunda-runda.

“Kebuah pia laban enti kitai majak terunda-runda, tu tau ngelabuhka kitai empu,” ku iya.

JULUK BESAI
Penanyi ti rindu ke pengawa berikan nya madah, iya ngarap kediri ulih nyingkang jauh ba dunya pemerindang baka sekeda bala artis Iban ti udah mujur.

Ambi ke chunto ku iya, baka penanyi Ricky Andrewson, Winnie Albert enggau mayuh agi ke bukai ti udah pegari nama.

“Nya alai, aku patut nitih singkang sida ngambi majak dikelala kelimpah ngangkatka industri muzik Dayak.

“Aku ngembuan pengandal ati ti besai industri muzik kitai deka maju baka industri muzik menua luar.

“Beguna amat kitai terus nyukung industri muzik diri kelimpah nyaga kualiti lagu bechuan ke pengelala bansa diri,” terang iya.

Ngena peluang berega tu, Avester Joe beterima kasih ngagai bala peminat diri, sida sebilik, bala bakih, kaban belayan enggau semua orang ti semampai nyukung enggau besampika pejalai iya ba pengawa merindang.

“Terima kasih lalu terus meh nyukung bala artis Dayak laban enti nadai sukung ari kita, sapa meh kami? Nya alai, begempung meh kitai terus sukung industri muzik Dayak,” ku iya.

BERITA LAIN

BERITA TERBARU

‘Strongman Challenge’ tarik minat orang awam

KUCHING: Penganjuran pertandingan ‘Strongman Challenge’ dapat menggalakkan gaya hidup sihat dan minda yang kuat dalam kalangan anggota polis serta orang awam. Komandan Pulapol Kuching, SAC