ARTIKEL

RETA BEREGA… Selamat Hari Apai ngagai semua bala apai ba serata dunya.

Apai meh reta pemadu berega ti nadai ganti

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

SYLVESTER RIANG
Suarasarawak.news@gmail.com

KELIMPAH ari indai, apai meh reta pemadu berega ti dikembuan kitai lalu penyayau apai nadai ulih diganti ngena sebarang utai ti berega ba dunya tu.

Serimbai enggau pengawa ngintu Hari Apai sehari tu, aram kitai belematika sejarah penumbuh Hari Apai.

Bepelasarka sebengkah penerang, sejarah Hari Apai tu bepun ba taun 1908 lebuh sebuah gerija ba menua Virginia Barat meri licha dikena masa 362 iku lelaki ti parai ba taun sebedau nya.

Semua lelaki nya parai maya gawa ngeluyang arang batu lebuh palan nya meletup.

Ba taun pengudah nya, siku indu ti benama Sonora Dodd ti datai ari pelilih Spokane, Amerika Syarikat chakah negika Hari Apai nyadi hari besai ba menua nya.

Iya ngereja pengawa nya dikena meri basa enggau ngaku budi apai iya, William Smart, siku veteran soldadu rambau perang ti nyadi ba menua nya suba sereta dilengkaka bini iya.

Nya alai, berengkah ari nya, William Smart ti nyadi apai tunggal naka ulih ngemesaika enam iku anak iya kediri ba sebuah kebun ti mit.

Ungkup penerang, Hari Apai keterubah diintu ba taun 1910 serimbai taun William Smart ada ke dunya tu.

Tang ba taun 1972, Hari Apai berengkah diintu ninting taun nyentuk sehari tu pengudah ex-Presiden Amerika Syarikat, Richard Nixon nyain siti undang-undang lalu Hari Apai dipasuk ba kalinda menua nya.

Udah nya, pengawa ngintu Hari Apai ngerembai ngagai menua bukai lalu diintu ba serata dunya.

Hari Apai diintu ba minggu ketiga (Hari Minggu) bulan June iya nya 16 June ti diintu ninting taun.

Berebak enggau Hari Apai ti diintu sehari tu, aram meh kitai meri ‘tepa’ ngagai apai kitai kelai penyayau enggau terima kasih kitai ngagai sida.

Bemacham pekara ulih dikereja kitai dikena ngintu Hari Apai baka meri apai bungai, meli kek, mai apai makai ba endur ti nyamai enggau ti bukai.

Pemadu beguna, kitai patut mandangka pengasih, penyayau, penyiru, pementas enggau pengibuh ngagai apai kitai.

Anang sesekali kitai bejaku kasar tauka datai jari ngagai sida laban enti nadai apai, udah tentu kitai ukai sapa-sapa.

Ngena peluang tu, Ruai Suara Sarawak meri Selamat Ngintu Hari Apai ngagai semua sida ti begelar apai sereta besampi Tuhan merekatka bala apai.

BERITA LAIN

BERITA TERBARU