Apai nguji masung anak ditan polis

KUCHING: Siku lelaki ditan pengudah ditemu nguji masung anak indu iya beumur lapan taun kena Hari Satu tu tadi.

Saspek beumur 32 taun ditan urung pukul 7.30 malam Hari Dua ba Kampung Selang Ulu, Jalan Matang pengudah polis nerima ripot ari bini iya.

Ketuai Polis Pelilih Padawan Superintendan Aidil Bolhassan madahka saspek benama Irwan Jeheri enda ngaku penyalah nguji masung anak iya empu lebuh ditukik polis.

Taja pia ku iya, saspek ngaku kala tinduk begulai enggau merap anak iya.

“Saspek mega ngaku diri lebuh tinduk kala ngansarka utai iya ba punggung anak iya nya,” ku iya ba penerang berita tadi.

Aidil madahka ulah nadai empedu malu saspek ditemu bini iya lebuh nguji masung anak indu ba rumah urung pukul 8 malam, Hari Satu tu tadi.

Ku iya, lebuh saspek begulai enggau anak seduai dalam bilik tang lebuh bini iya tama kia, anak indu nya bedawaka saspek nguji masung iya.

Ku iya, saspek enda ngaku lebuh ditanya bini iya tang anak seduai majak madahka apai iya bula.

“Anak iya mega madahka tu ukai keterubah tang udah tiga kali apai iya ngereja ulah baka nya dalam taun tu,” ku Aidil.

DITAN… Siku lelaki ditan pengudah diripot nguji masung anak indu iya.

Suara Sarawak