Apai Pandalela gaga pemujur anak chukup dibasa

KUCHING:  Apai Pandalela, Pamg Joheng, 54 taun madahka iya berasai gaga laban anak iya ti lumur dua ari empat iku menyadi mujur diberi basa ketegal penyulut ba main terejun.

“Ari mit iya endang rindu terejun nyentukka raban ba sekula meda iya bisi peluang ngaul diri dalam pekit nya sebedau ‘Jurulatih’ Sarawak ngambi iya masuk dalam main tu.

“Pekara ti ngirauka ati aku lebuh iya masuk main tu endang pengelikun laban tebal agi maya sida terejun tu selalu dipasuk ai dalam pending enggau pedis mata,” ku iya.

Taja pia, Pamg madahka iya enda kala nagang Pandalela lalu terus nyukung pengawa ti digaga anak indu iya nya.

“Ngagai apai indai ba luar, anang sanggu mai anak kita ngagai palan terejun ngambika sida angkun masuk dalam main tu.

“Taja pia, pekara pengelikun patut dikemeratka dulu kelimpah anang enda ngemataka sida lebuh bemain ai,” ku iya.

Nama Pandalela nyadi buah mulut selampur Malaysia lebuh iya nyadi atlet indu ti keterubah bulih midul engkeraju ba Lumba Olimpik London ba taun 2012.

Udah nya, iya sekali agi nempa nama ba tikas entarabansa lebuh teulihka midul pirak ba Lumba Olimpik Rio ba taun 2016.

Kediatu, iya benung nyikap diri dalam napi Lumba Olimpik Tokyo ti deka berengkah ba bulan April tu ila.