APAI SALI MANDOK PAKU LAWANG

Tusun kedua…

LEBUH iya nyau datai ba pendai sida Apai Seumang Umang, iya benasib bender laban lalu betemu enggau anak dara Apai Seumang Umang ti benong nyaukka labu.

Apai Sali lalu beguai guai nanya anak dara Apai Seumang Umang.

“Eh nama penama lauk kitai tengah hari tadi deh, endu Wai?” ku iya.

“Di sebut aku belama ga tadi, tang lebuh aku ti belanda niti batang ke nyengkar ai nya tadi dia iya lalu patah naban ke aku laboh ke ai.

GAGIT… Apai Sali benung manduk paku lawang ba dapur.

“Udah nya aku lalu enda ingat agi ke nama lauk kitai nya,” pia ku iya.

“Kasih deh nuan. “Paku” nyah nya tadi ke lauk kitai, “Paku” keruan ga nuan enda beli,” pia ku anak dara Apai Seumang Umang madahka Apai Sali.

“Enda ga beli, tang tak enda ingat ke nama “Paku” nya,” ku iya nyaut.

Malu bendar tudah Apai Sali, tang enda iboh kediri malu laban ti enda ingat ka nama “Paku”, laban nyawa tak sigi bam sereta enda tentu tak ibuhka pemalu agi ga iya.

Apai Sali pan lalu beguai guai ga belanda pulai baru ke rumah iya empu.

Nyau ke puas iya ti belanda dia iya lalu ngetu ba tebing sungai laban ti kelalu lelak serta ikak bekau ti belanda nya.

Lebuh iya ti duduk ba tebing sungai nya dia iya lalu tepedaka siku ikan Semah, nadai utai ngemesai mesai nya ngulap mansutka mulut iya ke atas ai semak iya ti duduk nya tadi.

”Apu! Besai bendar ga ikan Semah tu! Naka meh penyamai ikan tu enti iya udah dipanduk,” ku Apai Sali bejaku kediri.

Lebuh ti nyebut nya tadi dia iya lalu enda ingat ke “Paku” nya baru. Naka naka pemedis iya deh ati tudah Apai Sali ketegal ti enda ingat baru ke lauk ”Paku” nya tadi.

Iya pan nyau enda berasai ga lalu ngetil mulut diri empu ketegal ti barang utai rara sekumbang ti ngetu belelak ba tebing sungai nya tadi.

Lebuh ke ngetil mulut diri dia iya lalu mengkakai.

“Akai! Pedis amat ga,” ku iya.

Mulut iya pan nyau bangor laban getil iya tak naka pengudu ketegal ti pedis ati nya tadi.

Apai Sali pan lalu belanda baru ga ngagai rumah sida Apai Seumang Umang mai mulut diri empu ke nyau simbing laban bangor laban ti di getil iya tadi.

Datai Apai Sali ba pendai sida Apai Seumang Umang, iya mega seninjik bendar laban lebuh nya bisi tudah bini Apai Seumang Umang ga benong mandi.

Iya lalu enda chamang chamang lalu nanya bini Apai Seumang Umang.

“Nama lauk kitai pagi tadi Wai ?” ku iya.

“Keba nuan tu tambap enda ingat ke utai. “Paku”, “Paku” nyah nya tadi ke lauk kitai, Paku” ku bini Apai Seumang Umang.

Ke sekali tu Apai Sali lalu mulai kediri ngagai rumah iya empu. Nama agi deh serta Apai Sali tu tadi datai ba rumah iya din, dia iya lalu beguai guai ngasoh Sali ngiga tukul enggau raga ka kena iya ngiga paku.

Udah meh tukul engga raga nya di sua ke Sali ngagai apai iya, dia Apai Sali nyau berumban rumban ga mupuk baru laban enggaika hari malam lalu enggai kediri ke enda bolih paku laban ti agi belala makai paku ti di panduk anak dara Apai Seumang Umang nya tadi.

Iya pan lalu mupuk ngagai tungga tembawai langkau lama sida suba.

Tang meh Apai Sali lebuh ke makai nya tadi nadai nanya ke bakani bansa paku lalu sida Apai Seumang Umang pan nadai ga madah ngagai iya ni bagi bansa paku ke tau di empa, tak semina nyebut nama lauk nya “Paku” aja ke di empa sida ke dikumbai Apai Sali nya nyamai.

Meda pengawa iya ke beguai guai baka nya, Enchelegit seduai Sali sigi enda bemunyi meda pengawa iya lalu enda nanya ke guna Apai Sali enggau tukul sereta raga nya laban seduai iya nyangka iya ka ngaga langkau umai.

Datai Apai Sali di tembawai langkau, iya lalu enda chamang chamang mabut semua paku lawang ke bisi di peda iya lekat ba ramu tembawai langkau nya.

Nama agi deh tak nyau baka orang ke muar manyi gaya penyampat Apai Sali mabut paku dia.

Enda lama peda nyau bolih seraga mit semua paku ke udah di babut iya maya nya.

Apai Sali pan nyau lelak laban ti berumban kia kia serta lalu berunding mulai kediri ngagai rumah sida iya empu.

Datai di rumah, Apai Sali lalu enda chamang chamang lalu nanggar ke periuk tanah sida iya, alai iya ngerebus paku ke ulih iya ba tembawai nya tadi.

Lebuh maya nya Sali seduai indai iya udah nurun mandi ke ai. Lebuh iya ti manduk paku nya dia iya meda ai paku lawang ti betegar nya nyau kuning pelepung tegar laban ai anggat.

Enda nyalah nyalah baka ke bisi di gulai kari enggau santan pa penguning ai rebus paku lawang Apai Sali nya tadi.

“Apu! Amat gemu ga lauk Paku tu. Enda ngutuk lebuh iya di empa ba rumah sida Apai Seumang Umang tengah hari tadi tak naka iya penyamai.

“Tu baru iya naka iya penyamai lauk Paku serta kuah iya tu lagi,” pia ku Apai Sali bejaku kediri merening rebus paku iya nya dalam periuk tanah ke ditanggar ke iya.

Kira nyau bulih setengah jam Apai Sali udah manduk Paku nya ba periok tanah, iya pan lalu beguai ga ka nyepi pemansau lauk Paku nya.

Sereta meh Paku nya di sepi, iya lalu nadai runding agi, lalu dikunyah iya Paku nya tadi.

Sepi iya tak nadai utai bengat ngering nya asai Paku ke di kunyah iya, ngeli iya pan lalu patah sereta dilah iya pan lalu betu, mulut pan nyau bangor laban anggat Paku nya tadi.

Apai Sali pan pedis bendar ati meda Paku nya kering bendar dikunyah iya serta balat ngemedis ke iya.

Apai Sali lalu angkat serta lalu nyipak periok tanah ke alai iya ngerebus paku nya tadi. Nama agi deh periuk nya pan lalu siuh sereta tebelungging manjah tapa kaki iya.

Iya pan lalu rauh rauh manjong dalam bilik ba rumah iya nya munyi orang ti begau ke orang parai pa pemedis iya nat ke kaki iya ti betu serta Mayuh pemedis bukai ke olih iya ketegal ti bam ka makai belauk Paku.

“Akai Indai Duat!, Angat Indai Duat!” ku iya rauh rauh nyabak maring kediri ba sebelah bilik.

Lebuh iya ke tak benung ngelingkang baka belut nya dia Sali seduai indai iya baru pulai ari pendai udah ti mandi.

Sali seduai indai iya sama enda engkeretik meda Apai Sali nya ti ngeransi sereta ringat laban enggai Kediri dianu iya ngapa.

Dia meh tudah Apai Sali rauh rauh nadai orang ngaum nat ke pemedis.

“Akai Indai Duat!, Angat Indai Duat!” ku iya.

“Keba nuan tu tambap lap, lunggau tatau, mamau! Sapa orang ke bisi makai belaukka paku lawang,” ku bini iya Enchelegit nyaut

“Iya ga paku, ku anak dara Apai Seumang Umang madah ngagai aku tadi. Nya alai Paku ga ke dipanduk aku nya tadi ka ke lauk,” ku Apai Sali nyaut Enchelegit.

“Enggi orang ga ukai “Paku Lawang” ke lauk, “Paku Ikan” nya meh daun babas ke tau ke lauk kitai,” pia ku bini Apai Sali madah ke reti nya ngagai Apai Sali.

Apai Sali pan lalu bepaut dagu, sereta lalu ambi iya pua tekalong lalu pansut ke ruai bebungkur apus nat kediri gali ngicha ke mata ka tinduk laban ngetat ka pemedis udah ti ka makai Paku.