APAI SALI MANJUK BURUNG

Tusun satu…

NYADI nitih ku ensera menya Apai Sali tu sigi orang ti rindu bendar nyumpit.

Hari siti iya tak enda mukai mukai, enda nemu main, sereta enda nemu mimpi dia iya tak bisi ati ka manjuk burung laban ngasai kediri ti udah enda mujur nurun nyumpit sebedau nya laban ti tetenguk bendar ka makai burung.

Ensepi sida menyanak sehari nya tak nadai utai ke lauk dia iya lalu madah ngagai Enchelegit, madah kediri ka nurun manjuk burung ba tisi umai sida iya ti kira ka sebatang ruku ari rumah sida.

Iya meh lebuh Apai Sali nyau datai ba tisi umai sida, dia iya gaga amat ati ninga burung tak nyau tachuh makai buah kara sereta nyau bebesai dipeda iya berebut makai buah kara ti naka iya pengelebat.

“Apu! Tu baru iya, enggai nyadi enda bulih burung aku majok sehari tu. Nya baru rindu ngema burung ngemayuh nya di bai pulai. Nadai aku kala meda burung bengat ngemesai mesai sereta ngemayuh mayuh tu,” ku iya bejaku kediri berandau ngengali.

Datai ba pun kara nya dia iya lalu nadai ati dua tiga, sigi lalu beguai guai berumban niki pun kara nya enggai kediri enda bulih manjuk burung sereta laban hari ke nyau udah tinggi. Iya pan lalu belabuh begaga ke amba ba sebelah dan kayu kara nya.

Udah meh semua amba iya nya tembu digaga sereta ditan iya, iya pan lalu beguai guai ga nurun nganti ba pun kara nya ngalih ari sepiak enggai kediri empu dipeda burung.

Enda lama iya udah nguan ba pun kara nya dia iya lalu meda burung nyau bebital kena sintak amba panjuk iya nya tadi.

Bulih bendar semua panjuk iya nya dipeda iya ari baruh pun kara ke alai iya nguan. Iya lalu beguai guai niki pun kara nya baru ka ngulih ka semua burung ke udah ulih panjuk iya nya tadi.

“Apu besai amat burung tu! Ah, kati ku aku ka mai sida tu lagi pulai?

“Ka aku munuh burung tu nangi ke iya tak buot.

“Eh, manah agi ti ditanchang ke ba ujung iku sirat, ngambi ke sida enda lepas sereta agi idup dibai aku pulai,” pia ku iya bejaku kediri.

Iya meh semua burung ke udah ulih amba panjuk iya nya tadi ditangkap lalu beguai ga tudah Apai Sali nanchang ke burung nya ba ujung iku sirat iya empu.

Enda lama bulih ga panjuk siti, lalu ditanchang ke iya baka nya mega burung nya tadi ba ujung iku sirat iya.

Udah meh nya semakin lama semakin bulih ga panjuk Apai Sali tu tadi lalu iya pan lalu majak betanchang ke semua burung ke ulih iya ba ujung iku sirat.

Ku anak ati iya, ka mai burung nya pulai idup idup laban enggai ke burung nya mati lalu buot datai di rumah ke lauk sida menyanak.

Bulih panjuk siti lalu berumpan ga iya empu enggau naka pengelengkas ke ulih diri.

Iya meh kira ke nyau ka bulih lima puluh iku semua burung nya udah ditanchang ke iya ba ujung iku sirat iya ari mua enggau ari belakang.

Lalu semua burung nya pan nadai siku ga di bunuh iya. Nyau baka chiap pengerichah burung ngelinggi iya.

Burung pan nyau majak mayuh semayuh ke ulih tanchang iya ba ujung iku sirat bekelinggi ke tubuh iya.

Naka iya pengerindu sereta ransing iya sehari nya meda utai ulih diri.

Tak enda mukai mukai sekumbang ke benung kiruh betanchang ke burung ba ujung iku sirat iya, dia Apai Sali tak kesal sereta tekenyit ati.

Nyepi tak berenyut dan kara ke alai iya duduk nya tadi ke dikumbai iya di gusak antu, nadai ga meda utai nyelai.

Sepi iya tubuh iya tak nyau majak terangkat, berinyut ari dan kayu kara nya tadi.

Makin lama semakin tinggi ga asai tubuh iya nya tadi terangkat ari dan kara nya, nyau sampai ke iya nyau meda diri empu nyau udah ba atas puchuk kara nya tadi.

Udah nya iya nyau meda diri empu nyau bela peninggi enggau bukit ke ba tisi umai sida.

Nya baru iya nemu diri empu udah ditaban ke semua burung ke ditanchang iya ba ujung iku sirat nya terebai ke langit kin.

Nyau meh tudah Apai Sali nyepi tubuh diri empu nyau beribut terebai ba atas semua utai naka iya peninggi ninggi sereta naka iya penakut laban nangi kediri empu ti labuh sigi mati.

“Eh! Eh! Apu! Apu!. Nyau meh aku tu ditaban ke burung ke langit kin.

“Badu meh aku tu agi meda Sali seduai Enchelegit Tisi Langit, Enchelegi Tisi Hari.”

Apai Sali bejaku kediri enggau sabak sabak, sirut sirut laban ke takut sereta rawan meda peninggi diri empu udah terebai dibai burung.
Burung ke naban ke iya pan lama agi tinggi agi ga penerebai, nyau tinggi setinggi.

Nyau naka iya peninggi, rapas peda mata ari tanah, nyau bela enggau remang meh tudah Apai Sali ditaban ke burung terbai.

Makin lama selama dia enda mukai mukai tali ke kena Apai Sali nanchang burung nya pan nyau majak keru sereta lalu putus laban ti enda tan.

Burung pan lalu nyau siku siku ngelepas kediri ari ti ditanchang iya ba ujung iku sirat nya.

Enda lama lalu lepas ga siku, lepas ga siku, lalu majak lepas, lepas, lepas, selepas meh semua burung ke udah ulih iya nya tadi.

Tudah Apai Sali ke terbai ditaban ke burung pan nyau semakin lama agi semakin baruh sebaruh ga penerbai laban burung nyau semakin abis seabis ngelepas kediri.

Iya pan nyau majak takut sereta temati kutu nadai agi runding laban nemu diri sigi mati ti labuh terengkah ditanah.

Kira ka meh nyau ka sepuluh iku da kini burung nya ke agi bedau ba tanchang iku sirat iya.

Apai Sali pan lalu labuh enda nyalah nyalah baka punggu ke labuh ari puchuk kayu.

Nyau semerap meh munyi iya ti labuh nya tadi, dia tudah Apai Sali bisi bedemoh enda lama laban ti luput tegal ti labuh.

Nyadi pengelabuh Apai Sali tu tadi seninjik bendar tak terengkah ba tanju sida Keling Gerasi Nading, Bujang Berani Kempang, Bebini Mayuh Rambang di menua Panggau Libau Lendat Dibiau Takang Isang.

“Dop!” ku munyi Apai Sali labuh.

“Eh, nama nya tak Apai Sali ke labuh ari langit,” pia ku Indai Keling, ke benung nganchau padi ba tanju sida.

“Au! Aku meh tu ti ditaban ke burung terbai ari puchuk kara ke ba tisi umai kami,” ku iya madah ke cherita diri.

“Nama kebuah burung tau tak ulih naban ke nuan deh Dom?” pia ku Indai Keling.

“Badu enda meh. Nyadi aku tadi manjuk lalu bulih burung mayuh amat. Ka ati aku munuh tang takut ke iya buot ti datai di rumah.

“Udah nya semua burung ke udah ulih aku tadi lalu ditanchang aku ba ujung iku sirat.

Betampung minggu baru…