KAPIT: Siku apai tuai ti diripotka lenyau pengudah nurun ngiga pama ba Sungai Banyau, Nanga Sebala Mujong ditu kena Hari Satu udah ditemu kena ngalih hari Hari Tiga.
Ba operasyen ngiga enggau nyelamat (SAR) ke manggai hari kedua, apai tuai ke benama Nyipa Ajong, 68, ditemu urung pukul 2 ngalih hari.
“Tudah ditemu urung empat kilometer ari endur diripotka uchu lelaki iya lenyau lalu endur ngetu sebedau ngiga pama (Sungai Sangkabang ili).
“Lebuh ditemu, tudah nadai apa nama sereta nadai bakal ba tubuh,” ku pengari ari Palan Ngatur Operasyen Bomba Sarawak ba sebengkah penerang malam kemari.
Udah nya ku iya, tudah Nyipa dibai ngagai raban polis Kapit ngambi atur bukai dipejalai.
Berindik ari nya, SAR terus diketu urung pukul 7.42 malam pengudah raban sida datai ba Balai Bomba enggau Penyah Penusah (BBP) Kapit.
Kena 29 Julai nyin tadi, apai tuai nya enggau uchu iya nurun ke babas deka ngiga pama ke alai tudah lenyau lebuh seduai ba rantau jalai sama mulaika kediri kena pagi 30 Julai.
Lebuh uchu iya mupuk pulai pagi Hari Minggu nya, iya bejalai ba mua seraya aki iya entudi ari belakang kira takah berapa minit iya malik ke mua, meda aki iya nyau nadai dipeda.
Uchu iya udah nya nguji ngiga tudah ba sebelah endur nya tang puntan tetemuka iya.
Meda baka nya, uchu iya lalu pulai kediri nengah jalai darat enggau sungai urung tiga jam endur ngenataika diri ba rumah sida ba Rumah Bangkong, Nanga Sebala, Mujong.
Ari nya, BBP Kapit nerima penerang ari Balai Polis Kapit pasal kes orang lenyau urung pukul 10.32 pagi Hari Satu.
Operasyen ngiga semina ulih dipejalai kena Hari Dua ketegal takah menua ke jauh ari Pasar Kapit.
Operasyen SAR ngaul raban polis, Raban Nyaga Orang Periman Malaysia enggau peranak rumah panjai empu.
