Apin likun muka taska, tadika di Sibu

KUCHING: Semua taska enggau tadika di Sibu enda dikemendarka buka berindik ari Atur Mindah Betagang (PKP) dilanjar nyentuk 14 Februari.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madah, taja bisi peminta muka palan nya tang opis menteri apin meri pemendar.

Ku iya, kebuah pemutus nya digaga bepelasarka kandang menua nya apin likun kandang diatu.

“Taska enggau tadika ba Sibu semina dikemendar dibuka enti bisi kebuah berat baka peminta ari raban gawa di luan, tang kitai deka beratika baru pekara nya patut tauka enda.

“Nyema kitai puas ati, peminta muka palan tu endang ari raban gawa di luan, engka (inshaallah) kitai ulih ngemendarka palan nya dibuka,” ku iya.

Fatimah bejaku munyi nya rambau pejalai ngelawa Tadika Kurnia ditu, tadi.

Ku iya, naka diatu bisi sebuah taska ba Sibu bisi minta pemendar laban bisi anak raban gawa ba luan sekula dia, tang iya madahka pekara nya agi dalam pansik sida.